Ernaik hainbat ekintza gauzatu ditu aste honetan, «independentziaren alde eta espainolismoaren kontra». Bart gauean, Ribabellosan (Araba) zegoen Osborneren zezena eraitsi du gazte antolakundeak. Hori zen Euskal Herrian zegoen azkena, iaz eraitsi baitzuten Tuteran zegoena.
Aste honetan, besteak beste, Dantxarineko aduanako eraikinean (Urdazubi, Nafarroa) Gazteok independentzia leloa idatzi eta margo gorriz zipriztindu dute, eta Espainiako banderak kendu dituzte zenbait herritako udaletxetik eta eraikinetik: Berrizko (Bizkaia) udaletxetik eta Gasteizko Ibaiondo auzoko Gizarte Segurantzaren Diruzaintza Orokorraren Probintzia Zuzendaritzaren eraikinetik, adibidez.
Egindako ekintza guztietan, nabarmendu dute «sinbolo espainolistek» ez dutela tokirik Euskal Herrian, eta «independentzia beharrezkoa» dela «zapalkuntzarik gabeko herria eraiki eta Euskal Herriaren etorkizuna bermatzeko».
