Administrazioa.
• Administrazioek hizkuntza gutxituan (idatziz zein ahoz) ematen dizkiete beren zerbitzuak herritarrei.
• Jendaurrean diharduten langileek hizkuntza gaitasun egokia dutela bermatzen dute administrazioek.
• Zerbitzuak hizkuntza gutxituan emateko, hizkuntza plangintza orokor bat aplikatzen dute Administrazioko alor guztiek.
• Instituzio guztiek (udal, lurralde, erkidego, estatu nahiz beste edozein mailatakoek) plangintza betetzeko egutegi bat zehaztu dute.
• Osasun arloa: Egoiliarrei hizkuntza gaitasun egokia eskatzen zaie.
• Justizia: Tratamendu berdintasunaren printzipioari jarraikiz, hizkuntza komunitateko kideek eskubidea dute ahoz nahiz idatziz zuzenean jarduteko, interpreterik gabe.
• Polizia: Administrazioak neurriak hartzen ditu Poliziako kideak hizkuntza gutxituan aritzeko gai direla bermatzeko.
• Araututa dago edozein dokumentu zein argitalpen ofizialek balio juridiko osoa izango dutela, soilik hizkuntza gutxituan egon arren.
Hezkuntza.
• Haur Hezkuntza: Zuzenean edo zeharka finantzaketa publikoa jasotzen duten ikastetxe guztietan haurrei hizkuntza gutxituan irakasten zaie.
• Lehen eta Bigarren Hezkuntza: Bada murgiltze eta mantentze sistema orokor bat hizkuntza gutxituan.
• Lanbide Heziketa: Lanbide heziketa eta trebakuntza hizkuntza gutxituan eskuragarri dago eskatzen duten ikasleentzat. Lantokiko prestakuntza eta praktikak eskuragarri daude hizkuntza gutxituan.
• Unibertsitatea: Unibertsitate mailako ikasgai guztiak hizkuntza gutxituan eskuragarri daude. Ebaluazio agentzia eta instituzioek ez dituzte hizkuntza gutxituan egindako ekarpen zientifikoak gutxiago baloratzen.
• Hezitzaileek (kirol eta aisialdikoek) hizkuntza gutxituan aritzeko gai izan behar dute titulazioa eskuratzeko.
• Hizkuntza gutxitua ikastea: Hizkuntza gutxitua ikasi nahi duten herritarrek dohainik ikasteko aukera dute. Hizkuntza gutxitua irakasten da langabeentzako trebakuntzan. Hizkuntza gutxituan alfabetatzeko ikastaroak dohainik ematen dira.
Eremu sozioekonomikoa.
• Behar bezala araututa dago hizkuntza gutxituko kontsumitzaileen eskubideen aitortza.
• Produktuen osasun eta segurtasunari buruzko mezuak, hala nola sendagaien jarraibideak, produktuen arriskuei buruzko informazioa eta abar, hizkuntza gutxituan ere eskuragarri daude.
• Errotulazioa eta merkataritza informazioa eskuragarri daude hizkuntza gutxituan.
• Legez babestuta dago langileek lantokian hizkuntza gutxituan lan egiteko duten eskubidea.
• Enpresek hizkuntza gutxituaren erabilera bultzatzen dute.
• Sindikatuek hizkuntza gutxituari buruzko klausulak sartzen dituzte negoziazio kolektiboan, langileen hizkuntza eskubideak eta gizarte erantzukizuna bermatzeko.
Hedabideak eta teknologia berriak.
• Komunikazio sistema hedabide publikoetako eta herri ekimeneko hedabideetako ordezkariek kudeatzen dute modu osagarrian, eta elkarrekin lan egiten dute, baldintza berberetan eta elkarren lana errepikatzea saihestuz.
• Bada programazio osoa hizkuntza gutxituan ematen duen jabetza publikoko irrati kate bat.
• Bada programazio osoa hizkuntza gutxituan ematen duen jabetza publikoko telebista kate bat.
• Bada eduki guztia hizkuntza gutxituan argitaratzen duen eta finantzaketa bermatua duen egunkari bat.
• Administrazioarekin kontraturen bat duten edo harengandik zerbitzu, laguntza edo prestaziorik jasotzen duten jabetza pribatuko hedabideek hizkuntza gutxitua bultzatzeko kuota eta neurri batzuk bete behar dituzte.
• Programazio osoa hizkuntza gutxituan duten hedabideek laguntza bereziak jasotzen dituzte.
• Inbertsio politika jarraitu bat aplikatzen da, hizkuntza gutxituko hedabideen eskaintza normalizatzeko, diskriminazio positiboaren bidez.
• Administrazio publikoek neurriak hartzen dituzte hizkuntza gutxituko hedabideen ikusgarritasuna sustatzeko, komunikazio kanpainen bidez, hizkuntza gutxituko prentsa leku publikoetan egoteko laguntzen bidez eta abar.
• Irrati edo telebista lizentzia berriak ematen direnean, lizentzia batzuk gordetzen dira programazio osoa hizkuntza gutxituan ematen duten irrati eta telebista kateentzat.
• Administrazio publikoen softwarea hizkuntza gutxituan lokalizatuta edo hizkuntza gutxitura itzulita dago, eta herritarren esku jartzen da.
Kultura.
• Administrazio publikoek aurrekontu orokorretan kontu sail berezi batzuk dituzte hizkuntza gutxituko kultura sustatu eta kultura unibertsala hizkuntza gutxituaren bidez jasotzeko aukera bermatzeko.
• Bada laguntza sistema bat hizkuntza gutxituko sortzaileentzat.
• Bada kuota bat instituzioek antolatutako edo haiek diruz lagundutako kultur programazioetan hizkuntza gutxituan sortutako kultur adierazpideak bermatzeko.
• Zuzenean nahiz zeharka diru laguntza publikoak jasotzen dituzten hedabideek hizkuntza gutxituko kultur sorkuntza berriei buruz eman beharreko informazioa arautzen duen kuota bat ezarri da.
• Filmak hizkuntza gutxitura itzultzen dira (azpidatziekin nahiz bikoiztuta).
• Hizkuntza gutxituan eman beharreko kuota bat ezartzen zaie zinema aretoei.
Onomastika.
• Entitate autonomo bat (hizkuntza akademia bat, esaterako) arduratzen da hizkuntza gutxituko izenak estandarizatzeaz, hizkuntzaren aniztasuna errespetatuz.
• Erregistroek aukera ematen diete herritarrei beren izen-abizenak hizkuntza gutxitura itzuli edota hizkuntza gutxituaren grafiara aldatzeko.
• Hizkuntza gutxituko leku izenen estatus legala bermatzen du legeak.
