Bigarren eguna du Federico Martin Arambururen hilketaren inguruko epaiketak Parisko Krimen Auzitegian. Goizak interes berezia izan du, Loik Le Priol eta Romain Bouvier akusatu nagusien nortasuna aztertu baitute, eta galdeketa egin baitiete beren ibilbideari buruz. Eskuin muturreko familia burgesetatik datoz biak. Bien aitak GUDen militatu dute.
Romain Bouvierren nortasunaren azterketa egin dute goiz honetan, eta nortasun ikertzaile batek hartaz egin duen txostena irakurri du. Zer aurrekari judizial dituen ere aipatu dute, bi aldiz zigortua izan baita indarkeriagatik.
Familia burges batean handitua da, eta haren ama abokatu ezaguna da; aita, berriz, GUDeko militante izana. 2008an hil zitzaion aita, eta defentsako abokatuak ulertarazi nahi izan du aitarengana «sinbolikoki hurbiltzeko» hasi zela Bouvier talde horretan militatzen, Edouard Kleinen bidez, 2011n. Parisko Assas Unibertsitatean Zuzenbidea ikasten ari ziren biek, eta fakultate hori ezaguna da eskuineko eta eskuin muturreko ikasle sindikatuak dituelako. Hala esplikatu du Bouvierrek ere: «GUD taldearen jardunek irakasleen sostengu osoa zuten, legala zen, afixaketak egiten genituen, eta ikasle hauteskundeetara aurkezten ginen», zehaztu du.
Bouvierrek esplikatu du, ordea, Kleinengandik urrundu zela gerora, harik eta 2015ean jipoitu zuen arte. Izan ere, Le Priolekin eta beste kide batzuekin batera, GUDeko buruzagi ohia torturatu zuten bere etxean, eta bideoan grabatu. 2022an kondenatu zituzten afera horrengatik: Bouvier bost urteko kartzela zigorra betetzen ari da horren harira. Egungo auziaren funtsarekin loturarik ez badu ere, Bouvierrek esplikatu du Kleinen aferak ez zuela «neholako loturarik» militantzia politikoarekin. Epaimahaiburuari azaldu dio Kleinek «jarrera problematikoak» zituela emakumeekin, eta horregatik jipoitu zutela. «Zinez damutzen naiz hori egin izanaz, eta ohartzen naiz zinez zentzugabea izan zela hein horretako indarkeria baliatzea», erran du. Esplikatu du bortizkeria horiek ez zirela aldez aitzinetik pentsatuak izan —kontrakoa ebatzi zuen auzitegiak—, eta «berez», haren etxera joan zirela bostak, Kleinek haietako bat hauta zezan «buruz buruko borroka bat egiteko, baina ez zuen onartu». Nolanahi ere, bost urteko kartzela zigorra ezarri zioten afera horrengatik.
Zenbait hilabete lehenago, gainera, diskoteka batetik ateratzean borroka bat izan zuen beste pertsona batzuekin —Le Priol ere hor zegoen—, eta bi hilabeteko kartzela zigorra ezarri zioten ondorioz, gibelapenarekin. Erran du testuinguru «mediatikoak» eragina izan zuela afera hartan, Mediapart hedabideak Kleinen aferaren inguruan atera zituen artikuluen harira. «Mediapart-en artikuluek pisu handia izan zuten justiziaren balantzan».
Oro har, aitortu du GUDen inguruan ibili zela, baina «sei hilabetez bakarrik», eta erran du ez dela sekula militante «aktiboa izan». Izan dituen jarrera biolentoei begira, ondorioztatu du garai hartan «maskulinitate toxikoari» dagokion jarrera zuela, eta segurtatu du gaur egun bestelakoa dela.
24.000 euro armatan
Funtsezkoa da, bestalde, Bouvierren armetarako zaletasuna. Orotara 24.000 euro inguru gastatu ditu bildumatarako armak erosteko. Erran du «pasio historiko bat» zela gehienbat, eta «liburuen eta piezen bildumak egiten diren bezala» biltzen zituela armak. Parte zibilen abokatuek galdeturik, aitortu du nolanahi ere Arambururen hilketaren egunean ez zuela armatua izateko eskubiderik. «Arma hori soinean eraman izanaz damutzen naiz», erran du, eta esplikatu du Kleinen aitaren mehatxuen beldur zelako zeramala arma soinean, bestela itolarria sentitzen zuelako.
Bestalde, literaturazale «amorratua» da. Epaimahaiburuak zehaztu du haren etxearen miaketan Mein Kampf-en jatorrizko ale bat atzeman zutela, baita eskuin muturreko hainbat liburu ere. Bouvierrek bere burua defendatu du erranez ideologia «guzietako» liburuak biltzen zituela: Pol Potenak, Maorenak... «Berriz ere erranen dut: inkestatzaileek helburu politiko batekin egin dute miaketa, nire kontrakoa erabat, ez baitute nituen liburuen zerrenda osoa jaso», deitoratu du. Idazle izateko «ametsa» zuela esplikatu du. Aste honetan Mediapart hedabideak zabaldutako artikulu batean, preseski, haren idatzi baten pasarteak argitaratu dituzte: erranaldi misogino eta arrazistaz josia da.
Arratsaldean, Le Priol
Arratsalde honetan, akusatu nagusiaren nortasuna ikertuko du epaimahaiak: Loik Le Priolena. GUDen ibilia da hura ere, eta eskuin muturreko militantea zuen aita, Bouvierrek bezala. Gaur egun, Batasun Nazionaleko ordezkari diren batzuen lagun izandakoa da.
Frantziako armadako itsas komandoetan ibili zen. Eliteko unitate bat da, eta, hartan sartu zenerako jadanik, inteligentzia zerbitzuek fitxatua zuten lanjerosa zelakoan. Malin egon zen Frantziaren operazio batean, eta han gertatutako afera batengatik Frantziara igorri zuten berriz. Djibutiko prostituta bat zafratu zuen; Frantziako armadak 1.700 euro ordaindu zizkion emakumeari, kalte ordainez. Geroztik, trauma ondoko estresa detektatu diote Le Prioli, eta hain zuzen ere, auzian haren erantzukizuna apaltzeko baliatu nahi dute diagnostiko hori. Bestalde, 2015eko Kleinen kontrako indarkeriaren inguruko aferan, kartzela zigorra ezarri zioten Le Prioli ere, lau urtekoa.
