Espainiako Gobernuaren etxebizitza dekretuetan jaso dituzten neurri nagusiak

lehen dekretua

• Etxegabetzerik ez 2030era arte. Urriaren 1etik aurrera eta 2030eko abenduaren 31ra arte ezingo dituzte maizterrak kanporatu funts handien esku dauden etxeetatik, «baldin eta higiezin horiek merkatuaren baliotik beherako prezioan eskuratu badituzte». Kontratua amaitu arren, maizterra zaurgarria bada eta erakunde publikoek ezin badiote bizileku alternatibarik bermatu, administrazioak eska dezake kontratua bi hilabete luzatzeko.
• Putre funtsen espekulazioari muga. Inbertsio funts handiei etxea erostea mugatzen die legeak; zehazki, «helburu soziala etxebizitzak merkatuaren balioaren azpitik —%70 baino merkeago— eskuratzea duten izaera juridikorik gabeko entitateei.
• Kontratuaren ezohiko luzapena 2028ra arte. 2028ko abenduaren 31 baino lehenago iraungitzen diren eta ohiko etxebizitza alokatzeko diren kontratuak bi urte arte luzatu ahalko dira, maizterrak hala eskatzen badu eta ordainketak egunean baldin baditu.
• Errentaren urteko berrikuspenari muga. 2027ko abenduaren 31 arte, jabeek ezingo dute errentaren urteroko igoera egin eremu horretako erreferentziazko indizea gainditzen badu. Adostu ezean, igoera %2ra mugatuko da.
• Gastuak eta bermeak. Higiezinen agentzien kudeaketa gastuak eta Higiezinen Gaineko Zerga (HGZ) ezingo dizkiote maizterrari kobratu. Fidantzatik kanpoko beste bermeen kopurua gehienez bi hilabeteko errentaren parekoa izan daiteke —behin-behineko kontratuetan, hilabete batekoa—.
• Behin-behineko kontratuen eta logelakako kontratuen arautzea. Behin-behineko kontratua berritu nahi izatekotan, jabeak justifikatu egin beharko du. Ezin badu, ohiko etxebizitzaren kontratu bihurtuko litzateke. Bestalde, etxebizitza bat logelaka alokatu nahi izatekotan, logela guztien errentaren batuketak ezingo du gainditu etxebizitza osoa alokairuan jarrita izango lukeena.
• Etxebizitza turistikoek %10eko BEZa. Gobernuaren hasierako asmoa zerga hori %21ekoa izatea bazen ere, negoziazioen ondorioz, %10ekoa onartu du.
• Hobari fiskalak diru sarrera murritzak dituzten maizterrei. Alokairuan dauden eta urteko 33.000 eurotik beherako diru sarrerak dituztenek zergetan hobariak izango dituzte.
• Etxejabeentzat ere pizgarri fiskala. Ohiko etxebizitzako kontratuetan %50etik gorako hobariak izan ditzakete etxea alokairuan jartzen duten jabeek, eta %100ekoak ere izan daitezke zenbait faktoreren arabera; esaterako, etxea birgaituta badago, maizterra 35 urtetik beherakoa bada edo tentsio handiko eremu batean badago.

Bigarren dekretua

• Alokairuak automatikoki berritzea. Kontratua amaituta, alokairua ez berritzea erabakitzen duen jabeak maizterrari kalte ordaina eman beharko dio: dekretuaren arabera, hamabi hilabeteko errenta, ordura arte bizi izan den etxearen ezaugarri berarentzat finkatutako erreferentziazko indizearen arabera.