Espainiako Polizia atxiloketak egiten ari da gizonezkoen Munduko Kopako finaleko partidaren aurretik egon ziren liskarren harira. Aske errepresioaren aurkako mugimenduak zabaldu duenez, Muskizko (Bizkaia) pertsona bat atxilotu dute, eta ziurtzat jo dute gehiago ere badirela, haien abokatuak hala jakinarazi baitie. BERRIAk jakin duenez, operazio bat hasi du poliziak Bilbo inguruan, baina oraindik ezin da baieztatu amaitua dagoen ala ez.
Hilaren 19ko arratsaldean hainbat borroka eta liskar piztu ziren Bilboko Casilda Iturrizar parkearen inguruan. PPk bertan jarritako pantailan finala ikustera zihoazen eta aurretik euskal selekzioaren ofizialtasunaren aldeko manifestazioan parte harturikoen artean izan ziren. Sare sozialetan zenbait borrokaren bideoak zabaldu dira.
Egun hartan, Ertzaintzak 21 pertsona identifikatu zituen partidaren aurretik, eta orain atxiloturikoa ez da horietako bat. Pertsona bat ikertu zuten arma zuriz egindako mehatxuengatik, eta beste laurentzako zigor proposamenak egin zituen. Operazioa amaitu arte ezin da jakin zenbat atxilotu izango diren, lau zigor eskaera horiekin harremana duten, eta zein delitu egozten zaizkien. Dena den, badirudi desordena publikoa eta antzeko delituak egotziko dizkietela, eta ez larriagorik.
Informazio gehiagoren zain, Askek atxilotuei elkartasuna adierazteko elkarretaratzera deitu du biharko Muskizen (19:00), kultur etxearen aurrean.
Zazpi atxilotu aurretik
Bilbokoak ez dira egun hartako istiluen harira atxilotutako lehenak. Beste atxiloketak, baina, Ertzaintzak egin zituen. Segurtasun Sailak jakinarazi zuenez, zazpi pertsona atxilotu zituen Gasteizen, Donostian eta Berrizen.
Atxilotuetako hiru Gasteizen izan ziren, eta, Ertzaintzaren arabera, Espainiako selekzioaren elastikoa jantzita zeramaten pertsona batzuei eraso zieten. Bi pertsona gorroto erasoak egotzita atxilotu zituzten, eta hirugarrena, agintaritzaren aurkako atentatuaren delitua leporatuta. Donostiako atxilotuari agintaritzaren aurkako atentatuaren delitua egotzi zion Ertzaintzak, eta sei pertsona ikerketapean daude Espainiako selekzioaren zaleei mehatxu eta irain egiteagatik.
Berrizko atxiloketa, berriz, finala amaitu eta ia bi ordura izan zen. Ertzaintzaren arabera, Espainiako selekzioaren garaipena ospatzen ari ziren bi lagunen autoaren aurka jo zuen atxilotuak bere ibilgailuarekin. Atxilotuak Espainiako bandera bat kendu omen zuen biktimen autotik, eta haietako bati min egin zion eskumuturrean.
