Euskal Herriko hiriburuetan elkarretaratzeak egin dituzte Beatrice Molle eta Jean Noel Etxeberri Txetx bakegileei elkartasuna adierazteko, atzo eta gaur Parisen haien aurka martxan den epaiketaren harira. Gogora ekarri dute 2016ko abenduan Luhuson (Lapurdi) ETAren armagabetzeari bide eman zion ekinaldiak zer-nolako babesa izan zuen, eta absoluzioa eskatu dute bi kideentzat: «Absoluzio hori Euskal Herriko gatazka armatuaren ondorioei heltzeko determinazioaren eta gure historian kapitulu berri bat irekitzeko borondatearen zantzu argia izango litzateke».
📷 Eguerditan Irunea, Donostia, Gasteiz eta Bilbon elgarretaratzeak Bea eta Txetxen errugabetzea galdetzeko. Arratsean, Baiona, Maule eta Donibane Garazi. Auzia 13:30tan hasiko da.
— Artisans de la Paix #OrainPresoak (@Artisans_Paix) April 3, 2024
Errugabetzea bakegileentzat! Konponbide osoa orain! pic.twitter.com/GQafCzzYd2
Mobilizazioetan parte hartu dute, besteak beste, LAB eta ELA sindikatuetako ordezkariek, EH Bilduko kideek, Sare Herritarreko ordezkariek, Konponbide osoa orain.Bake Artisauak aske lelopean. Testu bateratu batean, Luhusoko ekintzan parte hartu zutenen jarduna goraipatu dute eragile horiek, argudiatuta «indarkeriarik gabeko konpromisoagatik aintzatetsitako aktibistak» direla: «ETAren armagabetze seguru eta ordenatuari bide emateko Paris eta Madrilen ekimenik eza konpentsatzera etorri ziren». Izan ere, gogoratu dute ETAk 2011n eman ziola amaiera borroka armatuari, baina Espainiak eta Frantziak «errepresioari, presoen sakabanaketari eta salbuespen politikei» eutsi zietela.
Ekintza hura 2017ko apirilaren 8an egindako armagabetze ekintzaren aurrekaritzat jo dute, eta, era berean, azaldu dute haren ostean ekin ziotela Parisen eta Bakegileen arteko «lan gune ofizialari», presoen egoera bideratzeko helburuarekin.
Eragileen esanetan, oraindik lan egin beharra dago «bake osoa eta iraunkorra» eskuratzeko. Halere, azaldu dute horrek emango duela modua «biktimak behar bezala aitortzeko, memoria egiteko, betebeharra betetzeko eta oraindik kartzelan edo erbestean daudenen egoerari heltzeko». Horiek hala, euskal presoei ezarritako salbuespenezko espetxe politikak amaitu daitezela ere eskatu dute: «Eskubideak errespetatzea oinarri duen etxeratze prozesu bat eraiki behar dela diogu».
