Etxebizitzaren auziari aurre egiteko «neurri zehatzak eta eraginkorrak» eskatu dizkiete administrazioei Bilboko hainbat kolektibok gaur goizean udaletxe aurrean. Udalen zein Eusko Jaurlaritzaren politikak salatu dituzte, konponbideak bilatzeko «eskumen esklusiboak» dauzkatela gogora ekarriz. Egoera «gero eta larriagoa» da haien ustetan, baina lekuko entitateak ez dabiltza «horretan» lanean, eragileek salatu dutenez.
Aldarrikapenak mamitzeko, Bilboko datuak mahaigaineratu dituzte Etxebizitza Ekintzak plataformako kideek. Batetik, etxebizitzaren prezioa etengabe igotzen ari dela salatu dute; esaterako, merkatu libreko etxebizitza berrien kasuan metro koadroak 5.015 euro balio ditu, batez beste. Hau da, 70 metroko pisu berri batek 351.000 euroko kostua izango luke. Horregatik, egoera gaitzetsi eta «merkatuan esku hartzeko» eskatu diete erakundeei, prezioak mugatzeko eta espekulazioa ahitzeko.
Bestalde, Bilboko 31.300 familiak izena eman dute Etxebiden, hamarretik zortzik babestutako alokairua eskatzeko. Eskaintza, ordea, «irrigarria» dela adierazi dute plataformatik. Zorrotzaurre auzoko Babes Ofizialeko Etxebizitzek, esaterako, 320.000 eurorainoko «prezio onartezina» dutela salatu dute, eskatzaileen urteko batez besteko diru sarrerak 16.000 eurokoak direnean.
Hustutako Bilbo
Zifra eguneratuen esperoan, 2022tik 2024ra Bilbon kale gorrian bizi diren pertsonen kopurua «hirukoiztu» egin dela ere ohartarazi dute. Negua ate joka den honetan, alokairu sozialeko eskaintza «nahikoa» dela bermatzea ezinbestekotzat jo dute, bai eta etxegabeentzako aterpetxeen eskaintza handitzea ere.
Etxerik gabeko pertsonen kopuruak eta etxe hutsenak ere alderatu dituzte: Bizkaian 34.000 etxe huts daude, horietatik 9.000 Bilbon. «Bilboko etxebizitza hutsen herena aski da Arabako, Bizkaiko eta Gipuzkoako etxegabeei aterpe emateko», salatu dute. Udalari leporatu diote, gainera, etxe huts horien jabeei %75 igo gura izatea ondasun higiezinen gaineko zerga, berez «%150 igo dezaketenean edota zuzenean desjabetu ditzaketenean».
Gaurko aldarrikapenak Bilbon ardaztu dituzten arren, ostiral honetan Araba, Bizkai eta Gipuzkoara zabalduko dute fokua. Azaroaren 6an, 11:00etan, elkarretaratzera deitu dute Eusko Jaurlaritzaren Bilboko bulegoen aurrean, ondoko asteko greba deialdia elikatzeko asmoz. Etxebizitza Ekintzak plataformatik greba orokorra «inflexio puntua» izango dela aurreikusten dute, eta egun horrek baldintzatuko dituela ostean eman beharreko pausoak.
