Kaleratzerik Ez plataformak uztailaren hasieran jakinarazi zuen Irunen (Gipuzkoa) bere bost seme-alaba adingabeekin bizi den emakume bat etxegabetze arriskuan zegoela. Kaleratzea gauzatzeko eguna ere ezarria zegoen: irailaren 7a. Atzo, baina, prozedura behin-behinean eteteko eskaera egin zion Kutxabankek —etxebizitzaren jabeak— epaitegiari. Aldeek urriaren 30era arteko epea ezarri dute etxea emakumearen senide batek erostea negoziatzeko.
Emakumeak zortzi urte daramatza etxe hartan. Aurreko jabeei alokatu zien, baina haiek ez zioten adierazi etxegabetze agindu bat zutela hipoteka ez ordaintzeagatik. Hala, etxebizitza bankuaren esku geratu zen.
Etxegabetzea gauzatzeko, Kutxabankek auzitara jo zuen, eta epaitegiek ebatzi zuten emakumearen alokairu kontratuak ez zirela baliozkoak, eta ekainean jakinarazi zuen kaleratze agindua.
Bi aldeek, baina, negoziatzen jarraitu dute, Irungo Udalaren eta Kaleratzerik Ez plataformaren bitartekaritzarekin. Hala, Kutxabankek epaitegiari eskatu dio etxegabetzea urriaren 30era arte atzeratzeko. Bitarte horretan, emakumearen familiarekin elkarrizketan ari dira, etxebizitza «onurazko baldintzetan» erosi dezaten.
Kaleratzerik Ez plataformak ontzat jo du erabakia, «etxegabetzeko mehatxu jasanezina» etetea lortu dutelako. Halere, gogoratu dute Gipuzkoan beste hamasei familia antzera daudela, «kontratuen amaiera eta ezkutu sozialaren erorketa» direla medio; besteak beste, irailaren 17rako etxegabetze agindu bat ezarrita dago Errenterian (Gipuzkoa). Horiek hala, elkarretaratze bat egingo dute larunbatean, 11:00etan, Donostiako Bulebarreko kioskoan.
