Gaur onartu du Eusko Jaurlaritzako Gobernu Kontseiluak 2026-2027ko ikasturterako unibertsitatez kanpoko ikasketak egiteko beken, laguntzen eta sorospenen deialdia. Begoña Pedrosa Hezkuntza sailburuak proposatu du, eta 72 milioi euro bideratuko dira, iaz bezainbeste. Eskaerak irailaren 30era arte aurkeztu ahal izango dira, Hezkuntza Sailaren egoitza elektronikoaren bidez, eta baita ikastetxeetan ere.
Deialdia Arabako, Bizkaiko eta Gipuzkoako ikastetxeetan 2026-2027ko ikasturtean matrikulatutako eta unibertsitatez kanpoko ikasketak egingo dituztenen ikasleei zuzenduta dago: Haur Hezkuntzakoei, Lehen Hezkuntzakoei, Derrigorrezko Bigarren Hezkuntzakoei, Batxilergokoei eta Lanbide Heziketakoei, baita hizkuntza, musika, dantza, arte plastiko, diseinu eta kirol ikasketak egingo dituztenei ere.
Adierazi dute deialdi honek bat egiten duela «Eusko Jaurlaritzak aukera berdintasunean oinarritutako hezkuntzarekin duen konpromisoarekin». Hezkuntza Sailak espero du 120.000 ikaslek eskatzea beka, eta azpimarratu dute helburua dela «ikasle bakar baten hezkuntza ibilbidea ere ez baldintzatzea arrazoi ekonomikoengatik». Horretarako, beka, laguntza eta sorospen sistema bat antolatzen du, «eskolaratzean sor daitezkeen beharrei erantzuteko egokitutakoa».
