Joan den asteburuan bi lagun atxilotu zituen Ertzaintzak Irunen (Gipuzkoa), haiek hango ertzain etxera bertaratu ostean, eta asteartean espetxera bidali zituen Espainiako Auzitegi Nazionaleko Antonio Piña epaileak, besteak beste, «ustez armak eta lehergaiak dituen leku bat» aurkitzeko informazioa edukitzea egotzita. Bada, Foruzaingoak, Auzitegi Nazionalaren agindupean eta Ertzaintzarekin elkarlanean, leku hori arakatu du, Urbasan (Nafarroa), eta ez dute ezer aurkitu, ElDiario.es agerkari digitalak jakinarazi duenez.
Zenbait hedabidek argitaratu zuten atxilotuek «ETAren zulo bat aurkitzeko koordenatuak» zeramatzatela kontrol batean atzeman zituztenean, irailaren 26an, eta epaileak ere hala jaso zuen atxilotuak espetxeratzeko kaleraturiko autoan.
