Espainiako Auzitegi Nazionaleko Antonio Piña epaileak espetxera bidali ditu joan den larunbatean Ertzaintzak atxilotu zituen bi pertsonak. Gaur deklaratu dute biek epailearen aurrean, eta hark behin behineko espetxeratzea agindu du, jarduera terroristarekin lotutako delituak egotzita. Epaileak aintzat hartu du fiskalaren eskaera, eta 34 urteko gizona eta 22 urteko emakumea espetxera bidali ditu behin-behinean. «Talde edo erakunde terroristekin» lotutako ustezko delituak egotzi dizkie biei. «Bake publikoaren aurkako atentatua» eta «armak eta leherkagaiak fabrikatzea eta edukitzea» ere gehitu ditu leporatutako delituen zerrendan.
Eusko Jaurlaritzako Segurtasun Sailaren arabera, «material oso delikatua» zeramaten hiru pertsona identifikatu zituzten irailaren 26an egindako kontrol batean, Eskoriatzan (Gipuzkoa). Aske utzi zituzten, ordea. Gero, hiru pertsona horietatik bi Ertzaintzaren Irungo polizia etxera (Gipuzkoa) joan ziren, aurreko larunbatean hain zuzen, abokatuarekin, eta Ertzaintzak atxilotu egin zituen. Beren esku zuten material horrek barne hartzen omen du poliziei eta segurtasun indarrei buruzko informazioa, eta «ustez armak eta lehergaiak dituen leku bat» aurkitzeko informazioa. Hala, «terrorismo» delitu bat egotzi diete.
Fiskalak Espainiako Zigor Kodearen 571. artikulua aplikatu behar dela esan dio Piña epaileari, Auzitegi Nazionalean: talde edo erakunde terroristari dagokiona. Atxilotuei 550. bis artikulua ere aplikatu behar zaiela gehitu du, agintaritzari erresistentzia egitearena.
Fiskalak Espainiako Zigor Kodearen 571. artikulua aplikatu behar dela esan dio Piña epaileari, Auzitegi Nazionalean: talde edo erakunde terroristari dagokiona. Atxilotuei 550. bis artikulua ere aplikatu behar zaiela gehitu du, agintaritzari erresistentzia egitearena; eta azkenik, 557. artikulua aplikatzeko ere eskatu du fiskalak: desordena publikoekin lotutako delitua da hori.
Polizia-etxean atxilotuak
Irailaren 26an, Eskoriatzan egindako kontrol batean hiru gazte atxilotu ondoren, Ertzaintzak ikerketa bat abiatu zuen, eta harremanetan jarri zen Espainiako Auzitegi Nazionalarekin, «kontuan hartuta bazitekeela gertakariak terrorismo delitu bat izatea». Ertzaintzaren Inteligentzia Bulego Nagusiak egin du ikerketa, eta, Segurtasun Sailak zehaztu zuenez, zenbait bilera egin dituzte Espainiako Auzitegi Nazionaleko agintari judizialekin, baldin eta ekintza judizialen bat egin behar zela erabakitzen bazen haiei «bide emateko». Ikerketak eta harremanak «aurrerapauso nabarmenak» izan dituzte, prentsa ohar baten bitartez jakinarazi zutenez.
Gaur bertan, Eusko Jaurlaritzako bozeramaile Maria Ubarretxenak azaldu du Imanol Pradales buru duen gobernuak «une oro» eman diola informazioa Espainiako Gobernuari, eta jakinarazi du Ertzaintzak atxilotutakoei atzemandako informazioan ez dagoela «Ertzaintzaren daturik, ezta agenteei buruzkoak ere». Ubarretxenak eskatu dio euskal gizarteari «atzerapausorik» ez emateko eta jarraitzeko urratsak egiten «bakearen eta bizikidetzaren bidean».
Jardun koordinakundeak atzo adierazi zuen atxilotuek ez dutela «inolako loturarik koordinakundearekin». Hainbat hedabidek, izan ere, Jardunekin lotu dituzte gaur Auzitegi Nazionalean deklaratuko dutenak. Aske antolakundeak, ordea, Jardunen kontrako «kriminalizazio kanpainatzat» jo du plazaratutakoa. Koordinakunde horren barruan sortutako erakunde bat da Aske, «errepresioaren aurkakoa» eta «amnistiaren aldekoa», eta irmo salatu du «Jardun seinalatzeko eta haren aurkako kriminalizazio kanpaina martxan jartzeko» baliatu dituztela atxiloketak.
Bestalde, AVT Terrorismoaren Biktimen Elkarteak akusazio popularraren rola hartzeko izena eman du Espainiako Auzitegi Nazionalean. AVTk esan du ekimen horren bidez «gertatutakoa argitzeko ekarpena» egin eta «dagokien arduren zigor garbiketa» egiten lagundu nahi duela.
