Frantziako Poliziak Urruñako San Bixintxio elizan aterpetuta ziren hamabi migratzaile atxilotu zituen atzo. Eguerdi partean izan zen polizia operazioa, eta horri erantzuteko, elkarretaratze batera deitu dute gaur, 18:00etan, eliza parean.
Urruñako Udalak gogor gaitzetsi ditu atxiloketak. Filipe Aramendi herriko auzapezak hala adierazi dio Sud Ouest egunkariari. «Gaitzesten dut Frantziako Polizia eliza barnera sartzea. Eliza toki publikoa izanik ere, molde horiek gaitzesgarriak dira», adierazi du. Ikuspuntu juridikotik itzal handiak ikusten dituela esan du, baina horren gainetik, «etikoki», Poliziak jauzi bat eman duela salatu du, «toki sakratu batean sartuta». Aramendik gaineratu du horrek ez duela migrazioaren auzia konpontzen. «Pertsona horiek mugara eramango dituzte, eta berriro saiatuko dira zeharkatzen, euren biziak arriskuan jarriz», jaso du Mediabask atariak.
Migratzaileek aterpe zuten eliza. Etorkinekin-Diakite eta Bidasoa Etorkinekin elkarteek ere salatu dute polizia operazioa. Ohar bateratu batean esan dute poliziek inpunitatez jokatzen dutela, eta geroz eta gehiago ikusten direla jarrera arrazistak: «Gure lurraldean ez ditugu horrelako ekintzak onartzen!».