Etxebizitza Sindikatu Sozialistak jakinarazi duenez, gaur eguerdian familia bat etxegabetuko dute Gasteizko Salburua auzoko Toni Morrison kaleko 24. zenbakian. 12:30erako aurreikusita dago etxegabetzea. Han bizi dira emakumea eta haren bi alaba adingabeak —8 urtekoa bata, eta 14koa bestea— . Andrazkoa indarkeria matxistaren biktima da, sindikatuak jakinarazi duenez. Eusko Jaurlaritzaren menpeko Alokabide sozietate publikoak kudeatzen du etxebizitza.
Emakumeak duela hilabete batzuk jo zuen sindikatura laguntza eske, eta, ordutik, haren kasuaren jarraipena egin dute sindikatuko kideek. Etxegabetzeari aurre egiteko erabakia hartua zuen emakumeak, eta sindikatuak etxebizitza aurrean mobilizatzeko deia egin du sare sozialen bitartez gaur eguerdirako, kaleratzea gelditzeko asmoz.
Etxebizitza Sindikatuaren arabera, kasu honek agerian uzten du instituzio publikoek jarrera desegokia dutela familia zaurgarriekin. Salatu duenez, etxebizitza publikoaren kudeaketan ere «jabe pribatuen logika bera» erabiltzen ari dira, errentagarritasuna lehenesten baitute herritarren ongizatearen gainetik.
Ildo horretan, Alokabideren datuak ekarri dituzte gogora: 2024an 34 etxegabetze prozedura abiatu zituen Araban, eta hamalau gauzatu zituen. Gaurkoa, beraz, joera horren beste adibide bat da, sindikatuaren esanetan. Are gehiago, sindikatuak kontraesan nabarmena ikusten du instituzioen diskurtsoaren eta praktikaren artean. Izan ere, duela gutxi aurkeztu zituzten Salburuan 225 etxebizitza berri, baina, aldi berean, handik metro gutxira martxan da familia bat kalean uzteko prozesua.
Indarkeria matxistaren biktima
Kasuak kutsu bereziki larria hartzen du kontuan hartuta emakumeak indarkeria matxista jasan duela. Hala ere, ez du laguntza eraginkorrik jaso, sindikatuaren arabera: ez etxebizitza alorrean, ezta laguntza ekonomikoetan ere. Are, sindikatuko kideek adierazi dute gizarte zerbitzuek oraindik ez diotela inolako bizitoki alternatiborik eskaini familiari.
Gainera, etxegabetzea bikotekide ohiak eragindako zorren ondorio da, eta horrek, sindikatuaren ustez, «babesgabetasun eta injustizia egoera» areagotzen du. Haien hitzetan, halako egoeretan instituzioak «ez dira soilik erantzuteko gai ez diren eragileak», baizik eta «egiturazko indarkeria horren konplize zuzenak» ere bai.
Etxebizitza krisia eta politika publikoak
Etxebizitza Sindikatu Sozialistak testuinguru zabalago batekin lotu du gertaera, etxebizitza krisiarekin, eta adierazi instituzioek merkatuaren logika indartzen jarraitzen dutela, diru publikoa etxebizitzaren negozioa sustatzeko erabiliz.
Salatu dute, besteak beste, azken urteetan neurri batzuk hartu direla klase ertainak lehenesteko, eta baliabide gutxien dituzten sektoreak, berriz, kanpoan utzi dituztela: horren adibidetzat aipatu dituzte zenbait pertsonari DSBE diru sarrerak bermatzeko errenta eskuratzeko aukera kentzea, babes ofizialeko etxebizitzetan sartzeko baldintzak gogortzea eta errolda soziala ukatzea.
Horrekin guztiarekin lotu gaurko etxegabetzea: «Langile klasearen geruza zaurgarrienen aurkako eraso bat da». Egoera ikusita, etxebizitza eskubide unibertsaltzat hartuko duen sistema baten alde borrokatzera deitu du sindikatuak. «Etxegabetze guztiei aurre egin behar zaie, nork gauzatzen dituen kontuan hartu gabe», adierazi dute.
