Gaur goizean EAJk ez ditu presentatu heldu den martxoko Ipar Euskal Herriko herrietako bozetarako hautagaiak, baina Heletako (Nafarroa Beherea) Agour gasnategian egin prentsaurrekoan, Peio Etxeleku IBBko presidenteak erran du EAJk gehiengoaren zerrendetan parte hartzea aurreikusi duela. «Gehiengoaren zerrendetan izan nahi dugu, zinezko eragina ukan dezagun erabaki publikoetan. Koalizioan eraikitzen diren listetan parte hartuko dugu, kontsentsua lortzeko asmoz».
Heldu den urteko martxoko bozak EAJrentzat «oso garrantzitsuak» izanen direla nabarmendu du Aitor Esteban EAJren EBBko lehendakariak. Alderdiarentzat pauso batzuk emateko aukera dela kontatu du, eta, orokorrago, nabarmendu du EAJren presentzia «baitezpadakoa» dela Ipar Euskal Herriko «autogobernuaren alde» eta «herritarren ongizatean» aurrera egiteko.
Ez du zehaztu nahi izan EAJ zein herritan aurkeztuko den, otsailean deklaratzen baitira hautagaiak haren ustez. Beraz, izenik eman gabe, lehentasunak zerrendatu ditu; hizpide izan ditu, bertzeak bertze, euskararen presentzia indartzea, biztanle berriak integratzea, etxebizitzaren krisia eta egoera ekonomikoa. Luzeago jardun du Euskal Elkargoaren gobernantza sistemaz. Etxelekuk adierazi du EAJk «azkarki» eragin nahi duela bertan. Ontzat jo du Euskal Elkargoak egin duen ibilbidea Ipar Euskal Herriak «ezagupen instituzionala» ukan dezan, baina haren ustez elkargoaren sorrerak «lurralde desoreka» ekarri luke «maila guzietan»: «Botere zentralistegi batek kendu die barnealdeko hautetsiei edo auzapezei elkargoa sortu aitzin zuten boterea».
«Gehiengoaren zerrendetan izan nahi dugu, zinezko eragina ukan dezagun erabaki publikoetan. Koalizioan eraikitzen diren listetan parte hartuko dugu, kontsentsua lortzeko asmoz»
PEIO ETXELEKU IBBko kidea
EAJ elkargo «indartsu» baten aldekoa da, baina beste instituzio baten sorrera eskatzeko «goizegi» litzateke Etxelekuren ustez. «Instituzio azkarrago baten alde izanen gara, baina ez gara jokoz tronpatu behar. Lasterregi joatea da beste instituzio baten sorrera aipatzea, oraino egin gabe baitago azken hamar urteotan Euskal Elkargoak egin duenari buruzko bilana».
Bertzalde, Gernikako Estatutuaren 46. urteurrenaren karietara, Estebanek oroitarazi du Eusko Jaurlaritzak ez dituela oraino galdegin eskumen guziak eskuratu. «Eusko Jaurlaritzak prest ditu txosten guztiak, eta Pedro Sanchezek egiazko borondatea erakutsi behar du azken eskumenak eskura ditzagun».
Jainagaren auziaz
Jose Antonio Jainaga Sidenorreko enpresaburuaren kontrako salaketaz ere mintzatu da Esteban. Erran du ez dela egin behar «aldez aurretiko epaiketarik», eta «aurreiritzirik ez izatea» eskatu du. «Antza denez, salaketa bat egon da, eta enpresak esango du zer gertatu den, eta ea oinarririk baduen salaketa horrek».
«Antza denez, salaketa bat egon da, eta enpresak esango du zer gertatu den, eta ea oinarririk baduen salaketa horrek»
AITOR ESTEBAN EBBko lehendakaria
Espainiako Auzitegi Nazionala Jainaga ikertzen ari da, kontrabandoa eta gizateriaren aurkako delitu batean konplize izatea egotzita. Francisco de Jorge epaileak ireki du inkesta, Sidenorrek Israel Military Industries (IMI) konpainia israeldarrari altzairua saldu diolakoan.
