Israelgo armadaren azken erasoen ondoren, Palestinar herriari elkartasuna adierazi diote berriro gaur dozenaka lagunek Bilbon, Palestinarekin Elkartasuna plataformak deituta. Izan ere, Israelek Gaza hiriaren aurkako lurreko erasoa abiatu ondoren, deitzaileek salatu dute «Palestinako biztanle guztiak akabatzeko planari» eusten diola Benjamin Netanyahuren gobernuak. Hala, herritarrak deitu dituzte Palestinaren aldeko konpromisoari eustera; eta erakunde publikoen «inakzioa» ikusita, argi utzi dute ez dutela onartuko «genozidioarekiko inolako konplizitaterik».
Donostian, berriz, manifestazioa egin du Palestinarekin Elkartasuna plataformak: 18:30ean abiatu da Saguestik. Ateri hasi duten arren, Kursaal parera iritsi direnean gogotik hasi du euria. Zurriolako zubitik zintzilikatu dira bi ekintzaile, «palestinar erresistentziari babesa adierazi eta Israelen desegitea aldarrikatzeko». Euriak, baina, ez du lortu elkartasuna geldiaraztea.
🇵🇸 Bi ekintzaile Zurriola Zubian zintzilikatu dira palestinar erresistentziari babesa adierazi eta israelen desegitea aldarrikatzeko
— Palestinarekin Elkartasuna (@Palestinarekin) September 20, 2025
Palestinar erresistentzia aurrera! pic.twitter.com/svvEwVMVWG
Bilboko eguerdiko elkarretaratzea Areatzan izan da. Palestinako bandera handi bat lurrean jarrita, inguruan bildu dira dozenaka pertsona, Eutsi Gaza! Israel suntsitu! Palestinar erresistentzia aurrera lelodun pankartaren atzean. Txaloka eta oihuka, zaratatsu aritu dira Israeli boikot egiteko eskatzen, Palestinaren askatasuna aldarrikatzen eta Europaren konplizitatea salatzen.
Izan ere, oso kritiko mintzo da Palestinarekin Elkartasuna plataforma Europako erakundeekin: «Estatuek ez dute ezer egiten, erakundeak eta enpresak konplizeak dira, eta ustezko ordezkari politikoek adierazpen lotsagarriak egiten dituzte, bi estatuetan oinarritutako konponbidea defendatzen». Gainera, adierazi dutenez, «promesa epelak eta keinu txikiak» egiten dituzte, baina, aldi berean, «genozidak babesten» jarraitzen dute, diruz, haiekin negozioak eginez eta haiei armak salduz.
Herritarrek «elkartasun geldiezina» eraiki izana txalotu du plataformak, eta azken asteotako desobedientzia ekintzak goratu ditu. Hala, Palestinarekin Elkartasunak konpromisoa agertu du «genozidioarekiko inolako konplizitaterik» ez onartzeko, palestinar herriaren «erresistentziarako zilegizko eskubidea» babesteko eta borrokan jarraitzeko Israelen «erregimen koloniala erabat desegin arte».
