Ertzaintzak 54 urteko emakume bat atxilotu zuen atzo Gernika-Lumon (Bizkaia), iazko azaroaren 22an bikotekidea hiltzea egotzita. Iturri ofizialen arabera, 62 urteko gizonezkoa ohetik erori zela esan zuen ustezko hiltzaileak. Bada, epailearen aurrera eraman dute, eta emakumea karguekin libre uztea erabaki zuen hark. Hori bai, tarteka Gernika-Lumoko epaitegian aurkeztu beharko du.
Erlazionatuta
Azaroaren 22an izan zen hilketa. Iturri ofizialen arabera, emakumeak auzokide bati eskatu zion laguntza, senarra logelan konorterik gabe «topatu» zuela eta; emakumearen arabera, ohetik erori zen lurrera, eta ezin zuen esnatu. Auzokideak berak deitu zien larrialdi zerbitzuei, eta horiek hilda zegoela baieztatu zuten. Gerora egindako autopsiaren bidez Ertzaintzak ondorioztatu zuenez, ordea, biktimak indarkeria zantzuak zituen buruan eta gorputzeko hainbat ataletan.
