Ohiz kanpoko arreta mediatikoa piztu du Getxoko (Bizkaia) gaurko udalbatzarrak, oposizio guztiak Amaia Agirre alkatearen dimisioa eskatua baitzuen Irurak Bat jauregia eraisteari buruzko auziaren harira. Bada, Agirrek hitza hartu du bilkuran, eta aukera hori baztertu: «Zarata sortu nahi dutenengandik aldenduta, nire erantzukizuna da Getxo gobernatzen jarraitzea, irmo eta zintzo». Udalbatzak gaur onartu du Irurak Bat jauregia eraisketagatik auzipetutako EAJko hiru zinegotziak kargutik kentzea.
PPk eta Elkarrekin-ek mozio bana aurkeztu dute gaurko osoko bilkuran, alkateari eskatzeko dimisioa eman dezala Irurak Bat jauregiaren auziko kudeaketa «eskasagatik», eta, hain zuzen, proposamen hori eztabaidatzen ari zirela eman du Agirrek bere erabakiaren berri.
Oposizioko taldeen, hau da, PPren, EH Bilduren eta Elkarrekin-en artean dauden desadostasunak ere agerian gelditu dira eztabaida horretan. Besteak beste, subiranistek popularrei egotzi diete EAJren eta PSE-EEren udal gobernuaren «makulu» izatea, udal aurrekontuak babestu zituztela eta. PPren mozioa bozkatu dute aurrena, eta aldeko zazpi boto izan ditu; PPrenak berarenak eta Elkarrekin-enak; hamabost zinegotzik eman dute kontrako botoa; EAJkoek, EH Bildukoek eta PSE-EEkoek. Hortaz, PPren mozioa baztertu egin dute.
Hala ere, udalbatzarra ez da amaitu, eta oraindik eztabaidatzeko dago alkatearen dimisioa eskatzeko Elkarrekin-ek aurkeztutako mozioa; gainera, EH Bilduk aurreratu du babestu egingo duela. Horrez gain, udala kudeatzeko batzorde bat sortzeko eskatuko dute subiranistek, eta hori ere eztabaidatzekoak dira.
