Ertzaintzak 22 urteko gizon bat atxilotu zuen atzo Arrasaten (Gipuzkoa), otsailean emakume bati sexu eraso bat egitea leporatuta. Eusko Jaurlaritzako Segurtasun Sailak jakinarazi duenez, biktimak ostiralean eman zuen erasoaren berri: salatu zuen gizonak Mondragon Unibertsitateko ikasle egoitza batean egin ziola eraso. Atxilotua epailearen aurrera eraman dute.
Mondragon Unibertsitateak komunikatu baten bidez gaitzetsi du erasoa. Erasoa salatzeko, eguerdian elkarretaratzera deitu dute campuseko fakultate guztietan, eta bost minutuko etenaldi bat ere egingo dute.
Horrez gain, unibertsitateak babesa eta elkartasuna adierazi dizkie emakumeari eta haren lagun eta senideei. Halaber, nabarmendu du biktimak «behar eta nahi» dituen baliabideak eskura izango dituela. «Indarkeria matxista ez da gertakari bakar bat, emakumeen duintasunaren eta osasun fisikoaren eta moralaren aurka egiten duen egiturazko arazo bat baizik», gehitu dute.
Mondragon Unibertsitatean eta horren inguruan indarkeria matxistarekin lotutako hirugarren salaketa da oraingoa. Duela hiru aste, Oñatiko Udaltzaingoak eta Ertzaintzak 51 urteko gizonezko bat atxilotu zuten Mondragon Unibertsitatearen Oñatiko campuseko aparkalekuan (Gipuzkoa), sexu eraso bat egiten saiatzea egotzita. Bergarako epaitegira eraman zuten, eta, epailearen aurretik igaro ostean, aske utzi zuten behin-behinean.
Udalaren salaketa
Arrasateko Udalak ere «irmoki» gaitzetsi du salatutako sexu erasoa. Zabaldutako prentsa oharraren bidez, udalak babesa eta elkartasuna helarazi dizkio biktimari, eta Mondragon Unibertsitateak egin gisan, esan du emakumeak behar eta nahi duen ezein «zerbitzu eta tresna» izango dituela eskura. Hala, mugimendu feministak deituko dituen mobilizazioekin bat egiteko deia egin du.
