Gutxienez bost lagun atxilotu dituzte gaur goizean Berriozarren, Antsoainen eta Iruñeko Txantrea auzoan. Guardia Zibilak eta Foruzaingoak 06:00ak aldera egin dituzte atxiloketak, eta, Poliziak oraindik azalpenik eman ez duen arren, polizia operazioak uztailaren 19an Espainiako lau militarri Berriozarren egindako erasoarekin du lotura.
Egun hartan, hainbat lagunen arteko liskarra izan zen herriko taberna bateko terrazan, Espainia eta Argentina Munduko Futbol Kopako finala jokatzen ari ziren bitartean, 22:15ean. Txanodun batzuek eraso egin zieten militarrei, eta, borrokan aritu ostean, korrika egin zuten ihes. Militarretako batek sinbologia nazia zeraman; zehazki, Nucleo Nacional taldearen kamiseta bat. Ostatu horretan maiz ibiltzen dira Aitzoaingo kuarteleko militarrak.
Guardia Zibilak jakinarazi zuen hiru militar zauritu zituztela, eta horietako bati buruan zauri bat egin eta hainbat saihets hezur hautsi zizkiotela. Denera, sei lagun inguru zauritu ziren istiluetan; batzuk larrialdi zerbitzuek artatu zituzten han bertan, eta beste batzuk osasun zentro batera eraman behar izan zituzten.
Unean bertan ez zuten inor atxilotu, baina erasoa jasan zutenek salaketa jarri zuten, eta ikerketa hasi zuen Guardia Zibilak.
Hainbat eragilek gaitzetsi dituzte gaurko atxiloketak. Iruñerriko Kontseilu Sozialistak, «faxismoaren normalizazioari ez!» dioen kartel baten bidez, atxilotuak askatzeko exijitu du, eta deialdiei adi egotera dei egin du. Ernaik, berriz, «erabat» gaitzetsi ditu atxiloketak: «Euskal Herrian ez ditugu ikur eta jarrera faxista eta espainolistak onartuko. Euskal Herria irabaztera! Faxismoari ez».
Udalaren erantzuna
Abuztuaren 25ean, Berriozarko Udalak arbuiatu egin zituen egun hartako istiluak. PSNk eta Zurekin-ek adostutako mozioa onartu zuen udalbatzak, EH Bilduren babesarekin. Onartutako idatzian, «indarkeriaren eta intimidazioaren aurkako erabateko arbuioa» aipatzen da, eta istiluetan zauritu zirenak «lehenbailehen osatzeko» nahia ere bai. Horrez gain, mozioan adierazten da «bizikidetzak giza eskubideen errespetuan» duela oinarria, baita «askatasunean, aniztasunean eta indarkeriarik ezean» ere. Hala, txartzat jotzen da «jarrerak edota izaera politikoko sinboloak erabiltzea balio horien aurka jotzeko».
