Egun handia dute gaur Irungo sanmartzialetan (Gipuzkoa): alarde parekideak, beste behin, kaleak hartzeko eguna da. Bero sapak ez ditu kikildu herritarrak, eta, abanikoa eskuan, oldean atera dira bide bazterretara. Aurten, hamahirugarren konpainia batu zaio alarde parekideari: Meaka.
Goizetik, konpainietako partaidez gainezka zen Urdanibia plaza, alarde parekidea noiz aterako. 10:20an egin dute abiatzea, hamahiru konpainiak txalo artean hartzen zituztela, eta San Juan plazarantz jo dute. Han, udaletxeko balkoitik, oles egiten ari zitzaizkien ordezkari politikoak ere.
Hasi da Irungo alarde parekidea. Hauxe izan da arrankada. Jendeak txaloak eta txaloak. @berriapic.twitter.com/Z9kdabELnZ
— Irati Urdalleta (@UrdalletaIrati) June 30, 2025
Maite Bergara da alarde parekideko jenerala; hura sartu da San Juan plazara zaldi gainean. Egoerak «hobera» egin duela kontatu zion joan den astean BERRIAri, baina oraindik auzia konpontzeko dagoela: «Bide bakarra dago: denontzat izango den alarde bat. Tokiko gobernutik harago, akordio politiko zabalago bat egon behar da, herritarren eskubideak defendatuko dituena. Iritsi da garaia zerbait egiteko, eta gu prest gaude edozertan laguntzeko».
