Joan den uztailaz geroztik, gehienez 2.500 metro koadro dituzten saltokiak eraiki ahal izango dituzte hirietako periferian, eta txikiagoak herri txikiagoetan. Hala ebatzi zuen Eusko Jaurlaritzak Europako araudiei jarraikiz. Legea onartu baino egun bat lehenago, ordea, Hondarribiko Udalak Zaldunborda Eremu Handiko Merkataritza Gunea eraikitzeko dekretua sinatu zuen.
Merkataritza guneak ehun saltoki, 2.000 aparkaleku eta gasolindegi bat izango ditu. Abotsanitzek, EH Bilduk eta PSE-EEk sinatutako ohar batean, ordea, salatu dute "irregulartasunak eta kudeaketa iluna" daudela haren atzean, eta leporatzen dio Txomin Sagarzazu alkateari hiriko merkataritza sarearen aurkako proiektu bat bultzatu izana.
Komunikatuan, hiru alderdiek ohartarazten dute proiektuak kalte egingo diola Jaizkibel magaleko ingurunea, hegaztien ohiko igarobidea dena, eta, aldi berean, autoen erabilera bultzatuko duela. Horiek hala, eskatu diote udalari eta Txomin Sagarzazu alkateari bertan behera utz dezala dekretua eta adostu dezatela oposizioarekin Zaldunbordaren etorkizuna.
