Santurtzik (Bizkaia) badu alkatea: Itziar Carrocera jeltzalea. Karmele Tubillaren dimisioaren ondotik, alkate berria izendatu behar zuen udalbatzak, eta gaur bertan aukeratu dute. Ikusteko zegoen PSE-EEk zer jarrera izango zuen. Izan ere, sozialisten idazkari nagusi Eneko Anduezak agindu zuen Santurtziko udal gobernuak jeltzaleen esku jarraituko zuela, haren alderdiak EAJrekin itun estrategikoa duelako Araban, Bizkaian eta Gipuzkoan. Santurtziko zinegotzi sozialistek, ordea, alkate izateko «inhabilitatutzat» jo zituzten EAJko zinegotzi guztiak, Tubillaren inguruko eskandaluaren ondoren.
Izan ere, Sonia Lopez Santurtziko Segurtasun zinegotzi ohia udaleko ikerketa batzordean aritu zen Tubillak dimisioa eman zuen egun berean. Udaltzaingoaren lan eskaintza publiko bateko azterketa baten filtrazioa ikertzen ari da batzorde hori. Lopezek dimisioa eman behar izan zuen, ustez filtrazio horrekin zerikusia izan zuelako, bikotekideari —udaltzaina bera— mesede egiteko. Zinegotzi jeltzale ohiak ziurtatu zuen «presio politikoak» jaso zituela udaltzaingoaren lan eskaintza publikoan «soslai jakin batzuen alde» egiteko.
Gutxiengoan berriro
Batera edo bestera, PSE-EEk ez du babestu EAJren alkategaia, Carrocera, baina aginte makila hari eman diote abstentzioaren bidez, eta EAJk Bizkaiko udalerri handienetan bosgarrena gobernatzen jarraitu du, baina orain arte bezala, gutxiengoan, alegia. Miren Matanzas EH Bilduk aurkeztu duen alkategaiak bere alderdiaren eta Elkarrekin Ahal Dugu-ren babesa jaso du, baina ez sozialistena, eta ez da nahikoa izan aldaketa egon dadin Santurtziko aginte gorenean.
Aginte makila hartu ondoren, Carrocerak esan du «dena» emango duela Santurtziren alde, ez duela «ezer» utziko bere herriak aurrera egin dezan. Carrocerak 49 urte ditu, Irakasle Eskolako diplomaduna da, eta gaur arte Kultura, Kirol eta Euskara zinegotzia izan da Santurtzin. 2019tik 2023ra, Berdintasun eta Gizarte Ekintza Saila zuzendu zuen, eta 2019tik 2020ra Begoñako Andra Mari egoitzako presidente ere izan zen.
