Jaurlaritzak eta Microsoftek euskaraz jarri dituzte Office eta Windows 8

Microsoft konpainiaren azken softwareak ere euskaratu dituzte: Windows 8 sistema eragilea, enpresak sortu duen azkena, eta Office 2013, bulego aplikazioen bildumetan berriena, dagoeneko euskaraz erabil litezke. Enpresaren webgunetik edo Eusko Jaurlaritzarenetik eskura daitezke. Jaurlaritzak 1990eko hamarkada amaieran hasi zuen lankidetza Microsoftekin, enpresaren softwarea euskaratzeko.

Atzo eman zuten euskaratu dituzten azkeneko produktuen berri, Bilbon. Patxi Baztarrika Eusko Jaurlaritzako Hizkuntza Politikarako sailburuordeak zehaztu zuen informazioaren eta komunikazioaren teknologiak ere euskaraz izatea beharrezkoa dela. Hala ere, «garrantzitsuena eta erabakigarriena» tresna horiek erabiltzea dela nabarmendu zuen.