Eusko Jaurlaritzako Osasun Sailak kezka adierazi du EHUk erabaki duelako datorren ikasturtean soilik beste hamasei ikaspostu eskaintzea Medikuntza eta Erizaintza Fakultatean euskarazko lerroan. Izan ere, sailburuak gogorarazi duenez, beste berrogei toki eskaintzea adostu zuten iaz aurreko errektoretza taldearekin, eta orain %60 gutxiago eskainiko dituzte. Alberto Martinez Osasun sailburuak nabarmendu du hamasei ikaspostu horiek «beharrezkoak» direla, baina ez «nahikoak». Martinezen esanetan, konpromisoa ez betetzeak «hezkuntza kalitatea murriztea» dakar.
EHUk kaleratu berri duen ohar baten arabera, berriz, iazko urrian aurreko errektoretzak egindako bileran dagoeneko aurreratu zioten sailburuari beste berrogei ikaspostu eskaintzea ez dela bideragarria, ez behintzat egungo baliabideekin: «Gaur egun euskaraz beste berrogei toki eskaintzea ez da errealista, kalitatezko irakaskuntza bermatu nahi baldin bada euskaraz. Kopuru hori datozen ikasturteetan urtetik urtera handitzea proposatzen du unibertsitateak; sailburuari martxoan izandako bileran azaldu bezala».
Medikuntza eta Erizaintzako Fakultatean datorren ikasturtean euskarazko beste berrogei toki eskaintzeko akordioa izan zen iaz Osasun sailburu berriak eta EHUk lortutako lehen akordioetako bat. Orduko hartan sailburua bera bildu zen EHUko orduko errektore taldearekin. Akordioaren azken helburua zen orotara laurehun toki eskaintzea, eta gazteleraz eta euskaraz eskaintzen diren ikaspostu kopurua parekatzea.
