Jesus Mari Zabarte euskal preso ohi arrasatearra hil dela jakinarazi du gaur Naiz.eus agerkariak; 80 urte zituen Zabartek. 1970eko eta 1980ko hamarkadetan ETAko kide izan zen, eta Hernanin (Gipuzkoa) 1984. urtean egindako sarekada batean atxilotu zuten. 29 urte egin zituen kartzelan. Parot doktrina aplikatuta geratu zen aske, Xabin Usandizagarekin eta Andoni Cabellorekin batera.
Espainiako hainbat kartzelatan egin zuen espetxealdia, eta haren ama, Joxepa Arregi, Etxerat elkartearen lehendakaria izan zen urte batzuez. Arregi 2010ean hil zen, eta omenaldia egin zioten Arrasaten (Gipuzkoa).
Zabarte atxilotu zuten sarekada ezaguna izan zen, Guardia Zibilak ETAko hainbat kide zeuden etxe bat inguratu eta granada bat bota baitzuen barrura. Bi lagun hil zituzten sarekadan, eta Zabarte tiroz zauritu zuten, hankan.
