Erlojuan 12:00ak puntu-puntuan. Kanpai hotsak. Oñatiko Unibertsitate zaharrean, Xabier Amuriza igo da oholtzara. Hasi da kantuan: «Bat Korrika, bi Korrika...». Lehenengo Korrikako abestia. Hain zuzen, gaur 45 urte abiatu zen lehenengo Korrika leku horretatik bertatik, 22:00etan, Euskal Herriaren luze-zabaleko kanpaiak jo eta jo ari zirela. Gaur hura sortzeko ekinean aritu zirenen lana omentzeko ekitaldi jendetsua egin dute: Ez gero, orain baizik. Bertan izan dira AEK-ko eta gainerako euskalgintzako ordezkaritza zabala, lehen sortzaileak eta beraien familiak, baita ordezkari politikoak ere.
Ikusi gehiago
Baina festak ez ezik, aldarrikapenak ere izan du lekurik: nabarmendu dute 45 urteren ondoren, 23 Korrikaren ondoren, oraindik AEK-k eta Euskal Herriak behar-beharrezkoa dutela Korrika.
Hasi, eskertzarekin hasi dira. Ane Elordi Korrikaren egungo koordinatzaileak hartu du hitza. Nabarmendu duenez, duela 45 urte mundu osoan hizkuntza baten alde egiten den ekitaldirik jendetsuena eta arrakastatsuena abiatu zen. «Badugu, beraz, zer ospatu, eta badugu nori eskertu». Banan-banan aipatu ditu Korrika gaur edena izateko lehen alea jarri zuten haiek: Urtsa Errazti, Joseba Kanpo, Enrike Ibabe, Josepe Zuazo, Alvaro Gurrea...
Eta aldarrikapenarekin jarraitu du, Korrika ez baita «jai giro» hutsa: «Zoritxarrez, oraindik, 45 urte eta 23 Korrika geroago, Korrika antolatzeko beharrizan berberak ditu AEK-k: euskararen aldeko kontzientzia suspertzea eta dirua biltzea, AEKren eguneroko lana indartzeko. Ez gara folklore. AEK gara. Korrika gara. Euskara gara».
«Zoritxarrez, oraindik, 45 urte eta 23 Korrika geroago, Korrika antolatzeko beharrizan berberak ditu AEK-k: euskararen aldeko kontzientzia suspertzea eta dirua biltzea, AEKren eguneroko lana indartzeko. Ez gara folklore. AEK gara. Korrika gara. Euskara gara»
ANE ELORDI Korrikaren koordinatzailea
Segidan, Urtsa Erraztik hartu du hitza, Korrikaren sortzaileetako batek. «45 urte, eta berriro hemen, Oñatiko Unibertsitatean». Berriro Oñatin, eta berriro helburu berberekin: «Zoritxarrez, Korrika aldarrikatzailea egiteko beharra dago oraindik».
45 urte igaro dira, baina...
AEKren Nazio Kontseiluko kide Aize Otañok eta Xabi Gartziak 45 urte egin dute atzera, 1980ra. Korrika egiteko arrazoiak aletu dituzte. Dirua batzea: «Sorrera hartan, AEK-k erakundeetatik ez zuen lortzen ez ofizialtasunik, ez dirurik». Eta euskalduntze-alfabetatzearen beharra sortzeko, kanpaina bat egiteko beharra, «herrikoia, irekia eta Euskal Herri osoaren batasuna adieraziko zuena». Horrelaxe sortu zen Korrika.
Otañoren esanetan, kontu batzuk ez dira askorik aldatu harrezkero: «Berriki esan dugu 24. Korrikan aldarrikatu nahi dugula euskara guztiontzako aterpe irekia eta erosoa dela; eta, nola ez, presa dugula beste pizkunde bat abiatzeko, Euskal Herri euskalduna lortzeari begira». Horretarako, beste gauza batzuen artean, AEK-k nabarmendu du helduen euskalduntzea lehen lerroan ipini behar dela: «Helduen euskalduntzea lehen lerrora ekartzeak esan nahi du botere publikoek gisa horretako aitortza egitea. Osterantzean, AEK-k jarraitu beharko du Korrika antolatzen, hala dirua biltzeko nola euskararen normalizazioaren aldeko lana aurrera eramateko Euskal Herri osoan».
Horiek horrela, «finantzaketa iraunkorra» galdegin du Gartziak: «Aldian aldiko hiru eremu administratiboetako diru laguntza sistema gainditzeko finantzaketa eredua behar dugu; hots, gure zerbitzua osotasunean finantzatzea». Eta Euskal Herri osoan «egitura iraunkor eta egonkor bat», zeinaren bitartez posible izango den ,«euskara ikasteko zerbitzua doan eskaintzea, herritarrek dirurik aurreratu beharrik ez izatea euskara ikasi ahal izateko, eta, horrela, euskara ikastea irisgarria izatea denontzat, herritar orori bermatu behar zaielako berezko hizkuntza ezagutzeko eskubidea».
Euskararen etorkizuna jokoan
Euskalgintza aspalditxoan ari da mezu bat zabaltzen: euskararen etorkizuna joan dago, eta beste pizkunde baterako garaia da. Hala esan du Otañok ere: «Helburu dugun Euskal Herria lortzeko, ezin dugu ezer geroko utzi; orain da unea». Eta nabarmendu du helduen euskalduntze-alfabetatzea giltzarria dela, eta administrazio nagusietako arduradun politikoei zuzendu zaie: «Zeuenak dira euskararen normalizazio eta biziberritze prozesuan eragiteko eskumena, gaitasuna, boterea eta lidergoa; zeuek bideratzen dituzue politika publikoak, eta orain da lehentasunezko politika publikoak abiatzeko garaia». AEKn oso argi daukate: «euskara gara. Orain ez bagara, noiz izango gara?».
Behin hitzaldiak amaituta, aurreskua dantzatu diete, eta topa egin dute. Korrikaren alde. AEKren alde. Euskararen alde.
