Kristau eskoletako langileek elkarretaratzeak egingo dituzte

DONOSTIA. Kristau Eskoletako langileek elkarretaratzeak egingo dituzte gaur, patronalaren jarrera salatzeko. Izan ere, ELA, Steilas, CCOO, LAB eta UGT sindikatuek nabarmendu dute greba egin zutenetik «patronalaren berririk gabe» jarraitzen dutela Kristau Eskoletan. Elkarretaratzeak 17:30ean egingo dituzte, Donostian —Kristau Eskolaren egoitzaren aurrean—, Gasteizen —Eusko Jaurlaritzaren Hezkuntza Delegazioaren aurrean— eta Bilbon —Bizkaia plazan—. Aurreratu dute mobilizazio gehiagoren berri ere emango dutela gaur.