EH Bilduk eta LABek gogor salatu dute EAEko Justizia Auzitegi Nagusiak euskara eskakizunen inguruan atzo ezagutarazitako epaia; haien ustez, euskararen kontrako «oldarraldi judiziala» areagotzen duen beste urrats bat da.
EH Bilduren arabera, ebazpen hori «euskararen aurkako oldarraldi judizialaren enegarren kapitulua» da, eta «erasoaldiaren eskalan jauzi izugarri bat» suposatzen du. Josu Aztiria legebiltzarkideak azpimarratu du euskara eskakizunen auzia «oinarrizko auzi demokratiko bat» dela, eta «demokrazian sinesten dugun guztiak interpelatzen» dituela. EH Bilduko ordezkariaren ustez, euskararen normalizazioan aurrera egin ahal izateko ezinbestekoa da «segurtasun juridikoa eta geure arkitektura juridiko-instituzionala sendotasunez blindatzea», eta horretarako Enplegu Publikoaren Legearen erreforma funtsezkoa dela deritzo.
Antzera mintzatu da LAB sindikatua. Nabarmendu du auzitegiak berriro ere administrazioei ukatu diela euskararen erabilera eremu sozioekonomikoan sustatzeko gaitasuna, eta ebazpen berria euskara bigarren mailan mantentzeko ahalegin sistematiko baten parte dela salatu du. LABen esanetan, epaileek haien «eskumenetatik harago» jokatzen dute, eta euskararen aurkako hizkuntza politika «kontziente eta militantea» egiten ari dira. «Epaile eta eragile euskarafoboek argi uzten dute, etengabe, ez dutela nahi euskara normalizatua izango duen eta espainieraren maila berean onartua izango den jendarte bat. Euskarak menpekotasunean, bigarren mailan, jarrai dezan nahi dute».
Mobilizazioak
Azaroaren 26ko data duen epai horrek baliogabetu egin ditu Eusko Jaurlaritzak 2023ko ekainean onartutako hizkuntza irizpideetako hainbat puntu, CCOO sindikatuak eskatu bezala. Honako hau ebatzi du: arlo publikoan jarduten duten enpresei ezin zaiela euskararen gutxieneko erabilera eskatu; enpresa horietako langileei ezin zaiela lehen hitza euskaraz egiteko betebeharra ezarri; eta ezin zaiela eskatu ikerketa edo proiektuak soilik euskaraz egitea. Halaber, atzera bota ditu C1 euskara maila egiaztatuta duten langileei enpresak antolatutako ikastaroak euskaraz egitea eskatzen zuen puntuak, eta euskaraz sortutako agiririk gaztelaniara ez itzultzeko irizpidea ere.
Auzitegiak «inposizioa» aipatzen du hainbat aldiz, eta defendatzen du hizkuntza koofizial batek ezin duela bestearen aurretik lehentasunik izan. LABek, ordea, uste du erabaki horiek euskararen normalizazioa nabarmen oztopatzen dutela eta herritarren hizkuntza eskubideak urratzen dituztela.
Horregatik, sindikatuak mobilizatzen jarraitzeko deia egin du, eta gogoratu du gehiengo sindikalak protestak antolatu dituela administrazio publikoan hilaren 16rako Iruñean eta 17rako Gasteizen.
CCOO: «kaleratze masiboak saihestu dira»
CCOOk jarri zuen salaketa eta epailearen ebazpenarekin konforme azaldu da. Sindikatuaren ustez, epai horrekin saihestu egiten da administrazio publikoak azpikontratatutako enpresetako langileen kaleratzea, eskatutako euskara maila egiaztatzen ez badute.
CCOOren arabera, euskara ikasteko gastuak ezin dira langileen bizkar utzi. Haren iritziz, ez da bidezkoa langile horiei funtzionarioek dituzten baldintza berberak edo oso antzekoak jartzea, haiek ez dutelako langile publikoek euskara ikasteko duten askatasun eta babes sistemarik -hezkuntza sitemakoek bezala, adibidez-, eta haiei ez zaielako berariazko laguntza ekonomikorik bermatzen horretarako.
CCOOk Jaurlaritzari eskatu dio epaiak azpikontratutako langileei aitortutako babes juridikoa bermatzeko. «Modu horretan soilik saihestuko dira egoera injustuak eta kaleratze masiboak, eta babestu ahal izango dira hizkuntza eskubideak eta lan baldintzak».
