Bizkaiko Etxeko Langileen Elkarteak eta hainbat erakunde feministak egindako salaketaren ostean, Bilboko metroan jarritako publizitate kanpaina erretiratu egin du Lagunklik enpresak. Jada kendu dituzte iragarkiak Bilboko metroaren geltokietatik. Hain justu ere, metroan eta tranbia eta autobusetan enpresak jarritako publizitatea gogor salatu zuten atzo etxeko langileen elkarteak eta erakunde feministek, «sexista» eta «klasista» delako, eta gaurko protesta egitera deitu zuten, Moyuako metro geltokiaren aurrean. Protesta hori ere bertan behera utzi dute deitzaileek.
Lagunklik enpresak barkamena eskatu die publizitate kanpainak mindutako kolektiboei. Enpresak BERRIAri jakinarazi dio kanpainak eragindako kritikak aintzat hartu dituztela, eta onartzen dutela iragarkien mezua ez dela egokia. Polemika aztertzeko krisi batzorde bat sortu du enpresak, eta hainbat talde feministarekin batzartu ostean hartu du kanpaina erretiratzeko erabakia. Metroko hainbat geltokitan paratutako publizitatea kendu dute, eta autobusetan eta tranbian jarritakoa ere kenduko dutela esan dute.
