Uztailaren 19an luizi bat izan zen Zarautz eta Zumaia arteko (Gipuzkoa) trenbideko Meagako tunelean. Berez hilabete eta erdirako etena izan behar zuena ia zortzi hilabetez luzatu da. Denbora horretan, Euskotrenek zerbitzuaren eten hori baliatu du ez bakarrik Meagako tuneleko luizia konpontzeko, baita trenak Urola ibaiaren gainetik pasatzeko erabiltzen duen zubia hobetzeko eta Meagako eta Done Mikel tuneletako trenbideak berritzeko ere. Ia hiru kilometroko bidea berritu dute. Lan horiek guztiak egin eta gero, larunbatean trenez bidaiatu ahalko da berriro Zarautz eta Zumaia artean.
Zortzi hilabeteotan bidaiariek autobusean egin dute bi herri horien arteko ibilbidea. ETS Euskal Trenbide sareak barkamena eskatu die erabiltzaileei sortutako eragozpenengatik.
Uztailaren 19an gertatu zen Meagako tuneleko istripua. Garai horretan zenbait lan egiten ari ziren tunelean, estaldura indartzeko, trenbidea berritzeko eta trenbidearen plataforma jaisteko.
