Eibarko (Gipuzkoa) gaztetxeko kideek jakinarazi dutenez, Ertzaintza eraikina hustera joan da 11:00 aldera, eta han daude oraindik. Gaztetxeko kideek BERRIAri adierazi diotenez, ez dute eraikina husteari buruzko aldez aurreko jakinarazpenik jaso. Goizean, gainera, gaztetxearen inguruan zeuden lau lagun identifikatu ditu poliziak, eta horietako bati isuna jarri diote.
Gaztetxeko kideen erranetan, Ertzaintza eraikinera joan denean, gazteek udaltzaingora jo dute informazio eske, eta udaltzainek erran diete jakinarazia zutela gaztetxea hustekoak zirela. Gazteek, baina, adierazi dute hori «gezurra» dela, eta ez dutela inolako abisurik jaso. Hala, dei egin dute gaztetxea hustu izana salatzeko, eta gaur eginen duten mobilizazioan parte hartzeko: 19:00etan, Untzaga plazan.
