Maider Etxebarria izango da, berriro ere, PSE-EEren hautagaia Gasteizko alkate izateko. Gaur agertuko da prentsaren aurrera, albiste hau bera iragartzeko.
EH Bildu izan zen garaile 2023ko foru eta udal hauteskundeetan, zazpi eserleku lortuta. Nolanahi ere, Etxebarriak eskuratu zuen alkatetza, EAJk eta PPk haren alde egin baitzuten, Rocio Vitero EH Bilduko zerrendaburuari bidea ixteko asmoz. Etxebarria izan da Gasteizko lehen emakumezko alkatea, eta beste lau urtez izan nahi du bertako alkate.
Etxebarriak Deustuko Unibertsitatean ikasi zuen: Enpresa eta Jarduera Turistikoetako Teknikariaren diplomatura du. Gerora, frantsesari buruzko goi diploma lortu zuen, eta Aleman Filologia ikasi zuen EHUn. Politikan aritu baino lehen, sektore pribatuan egin zuen lan gehien, esaterako, turismo gidari eta ekintzaile gisa.
PSE-EEk bere hautagaitza gehienen berri eman du, baina iragartzeke ditu Arabako ahaldun nagusirako hautagaia eta Donostiako alkategaia.
