Markel Olano Gipuzkoako ahaldun nagusiak esan du «garrantzitsua» dela EAEko estatutu berri baterako adostasuna lortzea, baina erantsi du ezin dela ukatu erabakitzeko eskubidea. "Ez nuke aurreikusiko nazio orok bere etorkizuna erabakitzeko eskubideaz daukan printzipioa ukatzen duen errealitate bat». Onda Vasca irrati katean emandako elkarrizketa batean, Olanok adierazi du «aurrez aurreko» jarrerak daudela estatutuaren testu artikulatuaren lanketan —adituen taldeak datorren astelehena arteko epea du idazteko—, eta gauza bera ikusi izan dela Eusko Legebiltzarrean, Autogobernu Lantaldean.
«Elementu erabakigarri bat dago: erabakitzeko eskubidea, zeinak ez duen talde denen babesik, baina ikusmira altxatu egin behar dugu«, azaldu du Gipuzkoako ahaldun nagusi eta EAJko kideak. Uste du egun «problematikoa« dela EAE Espainiako Estatuan uztartzea. «Jauzi garrantzitsu bat behar da, eta, testuinguru honetan, ezinbestekoa da euskal herritarrok gure etorkizuna erabaki ahal izatea«.
Aitortu du egungo eztabaidagatik «kezkatuta» dagoela, erabakitzeko eskubidearen aitortzan «atzera» egin ahal delako.
