«Marienea ez hunki» oihuen artean, ehun bat lagun elkartu dira Bouygues Immobilier higiezinen promotoreak Baionan duen egoitzaren aitzinean. CADE, Lurzaindia, ELB eta Ostia kolektiboko kideek Marienea ez hunki mezua zeukan zurezko panel batekin eta Kanboko lurretan (Lapurdi) eman ardiekin egin dute ekintza. «Bouyguesek ez badu proiektua gelditzen, herri erresistentzia izanen du aitzinean».
Maryse Cachenaut Lurzaindiko eledunak hartu du hitza lehen-lehenik, eta kontatu du hamar urteko «borroka» judizialaren ondotik errekurtso posible «guziak» eman dituztela CADE Ingurumenaren Aldeko Elkarteen Taldearen bidez. Nahiz eta proiektuaren bukaera haiek nahi zuten bezala ez kausitu, bide juridikoak proiektuaren kontrako argudioak plazaratzeko balio izan duela erran du, eta gainera hautetsiak sentsibilizatzeko bidea atzeman dutela nabarmendu du.
Izan ere, Marienea gunean egitekoa zuten higiezin proiektuaren kontrako posizionamenduek aurten «bihurgune» bat izan dutela nabarmendu du. «Kanboko Herriko Etxeko gehiengoa aldatu da, eta proiektuaren kontra posizionatzen da egun. Euskal Hirigune Elkargoko hainbat hautetsik Marienea laborantza lurra izan dadin nahi dute». Ondorioz, Bouygues eta lurren jabeak proiektua segitu nahi duten bakarrak dira egun. «Ahulduak» direla azpimarratu du Cachenautek, eta proiektua gelditzeko tenorea heldu zaiela adierazi du. «Espero dugu amore emanen dutela heldu diren asteetan. Proiektua ahal bezain fite gelditu behar da».

Elkarretaratzea egiteaz gain, higiezin enpresari gutun bat idatzi diote. Hura irakurri dute kolektiboko bi kidek, eta gatazkaren parametroak aldatu direla kontatu. Proiektuaren kontra egiteko herri mobilizazioa «indartu» eta jendearen atxikimendua «azkartu» dela erran dute. Higiezin agentziari jakinarazi diote bakar-bakarrik «tematzen» ari dela proiektuarekin. «Kanboko Herriko Etxeak, idatzi behar duen PLUIan [Herriarteko Tokiko Hirigintza Planean], Marieneko lurrak laborantza lur bihurtzeko xedea du, eta Euskal Hirigune Elkargoko hautetsi franko proiektuaren kontra dira. Ordua da gibel egin eta publikoki adieraz dezazuen».
Gutuna egoitzako postontzian sartu, eta honela finitu dute elkarretaratzea: «Aitzina eginez gero, zurrunbilo batean sartuko litzateke Bouygues, oposizioak eta herri erresistentziak irmoki segituko baitute proiektua bertan behera utzi arte. Mezu horixe helarazi nahi diogu gaur Baionako egoitzaren aitzinean».