Mikel Arrieta Llopis (Errenteria, Gipuzkoa) aske geratu da, 25 urteko espetxe zigorra osorik beteta. Etxerat-ek jakinarazi duenez, 2021eko uztailean lortu zuen Arrietak espetxe erregimenaren hirugarren gradua. 2022ko uztailetik baliabide telematikoen bidez bete du zigorra, espetxetik kanpo. Gaur, 25 urteren ondoren, libre geratu da.
📣 🟢 Mikel Arrieta Llopis aske, zigor osoa bete ostean. https://t.co/k42GcVK7oe
— Etxerat Elkartea (@EtxeratElkartea) July 31, 2025
📣 🟢 Mikel Arrieta Llopis queda en libertad tras cumplir la condena impuesta https://t.co/5TlttBvMJg#Etxerapic.twitter.com/f81M7Thjb4
2021ean, Arrietarengana bisitan zihoan lagun batek auto istripua izan zuen, Soriako espetxetik bueltan (260 kilometro). Etxerat-ek jakinarazi zuenez, orein talde bat sartu zitzaion errepidean, eta horien aurka jo zuen. Aurreko kristala hautsi eta autoaren txapa mailatu zitzaion, baina ez zuen kalte fisikorik izan. Taxi batean itzuli ahal izan zen Euskal Herrira.
Uztailean, Arrietaz gain, beste euskal preso bat askatu dute. Uztailaren 21ean, Jesus Maria Gomez Ezkerro Txutxo askatu zuten (Iruñea, Nafarroa), 24 urte espetxean eman ondoren. Bestalde, ekainean, Txetxu Barrios (Atarrabia, Nafarroa) baldintzapean geratu zen aske, 27 urteko espetxealdia egin ostean. Baldintzapean aske utzi zuten Ainhoa Barbarin ere (Urretxu, Gipuzkoa). Azkenik, Asier Oiartzabal Txapartegi (Andoain, Gipuzkoa) aske geratu zen, 24 urteko espetxealdia osorik beteta.
