Aurtengo Nafarroa Oinez «historikoa» izan da. Antolatzaileek horrelaxe definitu dute arratsaldean egindako balorazioan. Jaia irakurketa «oso positibotzat» jo dute, jende mordoa izan baita gaur Atarrabian (Nafarroa) eta ez baita gorabehera aipagarririk izan. «Atarrabian hain berezia izan den Nafarroa Oinez hau» egiteko ahalegin kolektiboa ere azpimarratu dute.
Arduradunek, eskerrak emateaz gain gaur bertaratutakoei, ausardia eskatu diete politikariei, «egungo zonifikazioa gainditu eta Nafarroako herritar guztien hizkuntza eskubideak bermatuko dituen hizkuntza politika ausart, integral eta eraginkor bat bultzatzeko». Bestalde, datorren urtean Nafarroako ikastolen jaia nork antolatuko duen ere iragarri dute: Zizur Txikiko San Fermin ikastolak eta Vianako Erentzun ikastolak.
Gaurko festari dagokionez, Paz de Ziganda ikastolakoek esan dute ezarritako helburuak bete dituztela, eta ondo aurre egin diotela «antolakuntza erronka handi horri».
Ikusi gehiago
Buruz, bihotzez, oinez lelopean, gustu eta adin guztietara egokitutako eskaintza atondu dute antolatzaileek; ez alferrik, hamabost lan batzorde eratu baitira ikastolan, eta jo eta su aritu dira urte osoan, arian-arian ekinaldiak egiten, eta batez ere, asteburuari begirako eskaintza oparoa prestatzen.
