Irratsaio baterako eginiko elkarrizketan, Nekane Murga Jaurlaritzako Osasun sailburuak adierazi du "koronabirusaren bigarren olatua izan litekeena" bizitzen ari garela egunotan, eta, ondorioz, neurri murriztaileak ezarriko dituela Jaurlaritzak datorren astean.
Sailburuak aurreratu du ezen neurri horiek, gaueko aisialdian aplikatzeaz gain, jendea pila daitekeen bestelako eremuetan ere aplikatuko direla, besteak beste ezkontzetan eta beilatokietan. Gainera, Murgak erantsi du neurriok ordutegietatik haratago joango direla, eta espero du aurki hasiko dela nabaritzen maskara eramateko derrigortasuna. Edozein modutan, kezka azaldu du, senideen arteko elkartzeetan ez direlakoan ari maskarak erabiltzen.
Horrez gain, jakinarazi du Osakidetzan dispositibo bat prestatu dutela COVID-19 kasuak asko ugarituko balira ere, baina erantsi du zaila izango litzatekeela gaur-gaurkoz dispositibo hori martxan jartzea, osasun langile asko oporretan daudelako.
Azken astean nabarmen egin du gora koronabirusaz kutsatutako herritarren kopuruak. Gaur bertan beste 229 herritarrek eman dute positibo PCR proban.
