Azken egunak agurrak egiteko izan dira EH Bildun: Espainiako Kongresura itzuliko ez direla iragarri dute Mertxe Aizpuruak, Bel Pozuetak eta Jon Iñarritu, eta Iñaki Ruiz de Pinedok ere iaz hartu zuen erretiroa. Gutxienez lau izen berri izango dira, beraz, 2023ko bozekin alderatuta. Koalizio subiranistako mahai politikoak gaur jakinaraziko ditu oinarriei proposatutako izenak, baina hedabide batzuk aurreratu egin zaizkie: Oihana Etxebarrieta legebiltzarkidea eta Gorka Elejabarrieta senataria izendatu ditu Gipuzkoako hautagaitzaren lehen eta bigarren zerrendaburuak izateko, eta Mikel Otero eta Oskar Matute ere zerrendetan izango dira, Arabatik eta Bizkaitik, hurrenez hurren. Asteburu honetan kontsulta telematiko bat egingo diote koalizioaren militantziari, horiek eta gainerako hautagaiak berresteko.
Oihana Etxebarrieta kazetaria da, eta gazte-gaztetatik dago lotuta mugimendu feministarekin; Hondarribian alarde parekidea sustatzen duen Jaizkibel konpainiako kapitaina izan da. Egun, Eusko Legebiltzarreko parlamentaria da, eta talde parlamentarioaren koordinatzaile lanetan eta 2024ko hauteskunde kanpainako eledun gisa ere aritu zen. Iaz, baina, lan horiek utzi eta Gorka Elejabarrietak zuzentzen duen EH Bilduren Harreman Politikoen Idazkaritzara batu zen.
Hain zuzen, Elejabarrieta bera zerrendakide izango du Gipuzkoan; bigarrena izango da, aurreratu dutenez. Orain arte, senatari aritu da Madrilen. 2023ko hauteskundeetan, EH Bilduk bi ordezkari lortu zituen lurralde hartan —Mertxe Aizpurua eta Jon Iñarritu—, baina orain hirugarren bat eskuratzeko aukera ere izan dezake, zenbait inkestaren arabera.
