Minutu batean isilik egonez eta haren argazkiaren aurreko suontzi batean sua piztuz omendu dute Gregorio Ordoñez, ETAk 1995eko urtarrilaren 23an hil zuen legebiltzarkidea.
Legebiltzarreko mahaiak 2014ko otsailaren 18an adostu zuen omenaldiak egitea hildako lau legebiltzarkideei –ETAk hildako Ordoñezi, Enrique Casasi eta Fernando Buesari eta GALek hildako Santi Brouardi–. Erabaki zuten hilketen urtemugan egitea omenaldiak, baina gaur arte ez dute osoko bilkurarik egin, Gabonengatik.
Legebiltzarrekoaz gain, beste hainbat ekitaldi ere egin dira Ordoñezen omenez. Esaterako, hil zuten La Cepa tabernaren atarian plaka bat jarri zuten, baina egun gutxiren buruan pinturaz estalita agertu zen. Horrez gain, Gregorio Ordoñez fundazioak erakusketa bat prestatu zuen, Gregorio Ordoñez: bizitza posiblea izenekoa.
