Gasteizko epaitegi batek ebatzi du Osakidetzak 1,2 milioi euro ordaindu beharko dizkiola bikote bati, haien haurraren heriotzaren harira. Jaio eta bost hilabetera hil zen, diagnostikatu gabeko gaixotasun genetiko baten ondorioz. Hala, Osakidetzari egotzi diote bikoteari «kalte moral handia» eragitea.
2018an izan ziren guraso aurrenekoz, ugalketa lagunduaren bidez, baina haurra jaio eta bost hilabetera hil zen. Gerora egindako txosten genetikoan, ez zuten patologiarik atzeman, baina ez zuten baztertu heriotzaren eragilea alterazio genetiko bat izan zitekeenik.
Bigarrenez guraso izatea erabaki aurretik, bikotea Gasteizko ospitaleko mediku batekin jarri zen harremanetan, ez zuelako nahi berriz halakorik gertatzerik. Bada, mediku horren arabera, «arriskua txikia» zen. 2020an jaio zen bigarren haurra, eta hura ere bost hilabeteren ondoren hil zen. Horren ostean egindako azterketa batean, NFU1 genearen mutazio bat atzeman zuten, ordura arte aurkitu gabea.
Hala, Gasteizko epaitegi horrek ebatzi du Osakidetzak proba eta azterketa gehiago egin behar zituela, eta «praxi txartzat» jo du bikotea artatu zuen medikuaren jarduna.
