Uda osteko lehen mahai politikoa egin du Euskal Herria Bilduk gaur, eta batzar osteko agerraldia egin du Arnaldo Otegi koordinatzaile nagusiak. Udan zer berretsi den azaldu du lehen-lehenik, euskal politikan bete-betean sartu aurretik. Palestinaren aurkako genozidioa aipatu du, eta esan du juduen aurka ezarri nahi izan zuten «azken soluzioa» palestinarren aurka aplikatzea erabaki duela Israelek, eta, hala, palestinar herria desagerrarazi. Otegik uste du erori egin dela II. Mundu Gerra ondorengo «egitura guztia», eta Europako Batasunak bere «langileak saldu» dizkiola AEBetako presidente Donald Trumpi. Haren ustez, «Trump munduko enperadorearen kolonia baten itxura» hartu du Europak, eta Europako Batzordeko presidente Ursula von der Leyenek «langileak saldu» dituela, «murrizketekin ordainduko dituztelako AEBei egin behar zaizkien arma erosketa izugarriak».
Koalizioko buruak adierazi du ere ezin dela ukatu klima aldaketa gertatzen ari dela, «udako gau tropikalak, itsasoko tenperatura beroa eta Iberiar penintsulako suteak» ikusi ondoren. Haren ustez, orain behar dira horri guztiari aurre egiteko politikak.
Udako folletoiak
Eta etxera etorrita, adierazi du udako sasoian berretsi direla gero eta gehiago azaleratzen ari diren arazoak: «langileen bizi baldintza txarrak, etxebizitza bat lortzeko arazoak eta gazteen soldata lotsagarriak»; eta ironiaz helarazi du udak erakutsi duela berriro ere horren guztiaren errudun EH Bildu dela, «udako folletoi» esan dieten horien ondorioz. «Egiturazko arazo horiei buruz hitz egin beharrean» alderdi eta hedabide gehienak «udako folletoi» horiei begira egon direla esan du.
«Gobernuan aritu diren alderdiek urte askoan ezarritako politikek ekarri dituzte langileen bizi baldintzak okertzea», ziurtatu du koordinatzaile nagusiak, eta «alderdi horiek Gasteizen eta Iruñean gobernatzen ez dutenen bizkar ezarri nahi dituzte». Bada, EH Bilduk ez du «mezu pesimistarik» eman nahi. Otegik esan du badela «esperantza eta alternatiba». Gogorarazi du koalizioak irailaren 20an egingo duela konferentzia politikoa, eta azaroaren 12an horri loturiko masa mobilizazio bat.
«Gobernuan aritu diren alderdiek urte askoan ezarritako politikek ekarri dituzte langileen bizi baldintzak okertzea; politika horiek aldatu egin behar dira»
ARNALDO OTEGI EH Bilduko koordinatzaile nagusia
Aurreratu du EH Bilduk «elkarlanaren aldeko apustua» egiten duela, «gutxieneko akordioak lortzeko, baina edukietan oinarriturik». Izan ere, koalizio subiranistak oso argi du eztabaidaezina honako hau dela: «egiturazko arazoak eragin dituzten politikak aldatu egin behar direla». EAJri eta PSE-EEri begira eginiko mezuaren traza hartu dute hurrengo hitzek: prest daude aldaketa horren «erritmoa eta neurria» negoziatzeko, baina argi edukita «politikak aldatu» behar direla.
Estatus politiko berria
Halaber, «Espainiako toxikotasunaren aurka euskal alderdiek herri gisa» jokatu behar dutela azaldu du Otegik. Erantsi du Espainiarekin dagoen harremana aldatu egin behar dela estatus berri baten bidez, «burujabetza handiagoa behar delako tresnak garatu eta aurrez aurre ditugun erronka handiei aurre egiteko». Horregatik, herri gisa jokatzeko eskaera egin du, «eta ez alderdi ikuspegiarekin», batik bat EAJri erreparatuz siglak aipatu ez arren.
Berretsi du estatus berri hori lortzeko lanean ari direla alderdiak, adosten dena «blindatu» egin behar delako. Eta, edonola ere, atzera esan du «Espainiak estatu plurinazionala» dela onartu behar duela lehenbailehen, hori dela giltzarrietako bat.
Otegik ez daki Pedro Sanchezek hauteskundeak aurreratuko dituen ala ez, baina esan du EH Bildu prest dagoela aurrekontuak negoziatzeko, Madrilek aurrekontuak aurkezten baditu. «Gure interesa da Espainian eskuin muturrak ez gobernatzea. Hego Euskal Herrian, jendeak EH Bilduren alde edo EAJren alde bozkatu baino gehiago, eskuin muturrak ez gobernatzearen alde bozkatu zuen».
Hala, eragile politiko, sindikal eta sozial guztiei dei eginez amaitu du: «Ahalegindu gaitezen euskal politikara ez ekartzen Madrilgo giro toxikoa. Guk urteak daramatzagu goi mailako politika, eztabaida serioak eta benetako irtenbideak eskatzen. Hori da gaur berriz altxatzen dugun bandera: esperantzaren eta alternatibaren bandera».
