Parlamentaria foru aldundira

Garbiñe Mendizabal izango da Gipuzkoako Foru Aldundiko Hizkuntza Berdintasuneko zuzendaria. Mikel Irizar izan da kargu horretan legealdi hasieratik, eta dimisioa eman zuen joan den astean, arrazoi pertsonalak argudiatuta. Mendizabal datorren astean izendatuko dute. Ez du postu arrotza izango: Euskara zuzendari izan zen 1991 eta 1995 artean.

Mendizabal Tolosakoa (Gipuzkoa) da sortzez, baina Zaldibian bizi da umetatik. 57 urte egingo ditu aurten. Euskal Filologian lizentziaduna da, eta euskara teknikaria da ogibidez. Politikaren arloan dabil urteotan. Zaldibian zinegotzi izana da, eta EAJko legebiltzarkidea izan da 2009tik orain arte. Hizkuntza politikari buruzko gaiak izan ditu parlamentuan. Orain, diputazioan.