Pertsona bat zauritu da Donostiako Herrera auzoko Zardoya Otisen eremuan dagoen pabiloi batean piztutako sute baten ondorioz. Gauerdia pasatuta piztu da sutea, hango pabiloi bateko gela batean. Suhiltzaileek itzaltzea lortu duten arren, zauritua Donostia ospitalera eraman behar izan dute, eta beste hiru pertsona ere artatu dituzte, kea arnasteagatik.
Lehenengo ikerketen arabera, litekeena da sutea nahita piztua izatea. Are, Donostiako Udaltzaingoak zenbait lagun atxilotu ditu, lekukotzak eta informazioa biltzeko, eta baliteke datozen orduetan norbait gehiago atxilotzea. Etxegabeak bizi dira Zardoya Otisen eremuko pabiloietan, eta gehienak migratzaileak dira. Donostiako Udalak eremu horretako pabiloi eta eraikin guztiak hustu asmo ditu; horietako bat, Jolastokietako 4. pabiloia, urtarril amaieran hustu zuten.
