Ez dituzte karabela portugesak espero. Ez dituzte algak espero. Ez dute hondoratutako itsasontzi baten erregaia espero. Landetako (Okzitania) kostaldean kokaina espero dute. Kokaina fardoak. Marea zuria.
Frantziako Poliziak uste du kokaina zeraman itsasontzi batek uretara bota zituela hamabost tona kokaina, eta kokaina fardoak jitoan dabiltzala. Gendarmeak Landetako kostaldea zaintzen ari dira asteartetik, haizeak eta korronteek fardoak bertara bultza ditzaketelako. Hala jaso dute Sud Ouest eta Actu Bordeaux komunikabideek. Gendarmeak oinez, zaldiz, motoz, buggy-en bidez (harearen gainean ibiltzeko ibilgailuak) eta helikopteroz zaintzen ari dira Landetako kostaldea. Gau eta egun. Oraingoz ez dute kokaina fardorik topatu.
Le Porgeko hondartzak herritarrentzat itxita daude atzotik, alkateak hala erabakita. Herritarrak ezin dute bertara joan, ezin dute bainurik hartu eta ezta uretako jarduerarik egin ere. Polizien gomendioak jarraitu dituela eta herrian kokaina fardoen bila ari diren «pertsona susmagarriak» azaldu direla kontatu du Sud Ouest-ek.
