Ikasleen protestak ez du etenik Ipar Euskal Herrian. Joan den ostegunean izan ziren istiluen ondotik, ikastetxeak ixtea erabaki dute Baionako lizeo publiko gehienetan, eta ikasleak etxera bidali dituzte. Klaseak online segitzera behartu dituzte, baina blokeoa sareetara eramateko ekintzak biderkatzen ari dira. Irakasle sindikatuek ere online klaseak ematea errefusatzera deitu dute. Seaskako Bernat Etxepare lizeoan hiru egun daramatzate ikasleek ikastetxea blokeatzen. Gaur manifestazioa egin dute Baionako suprefeturara. Ikasteko baldintza duinak eta euskarazko irakaskuntza aldarrikatu dituzte, eta Frantziako Poliziaren indarkeria salatu.
«Haserre gara, eta zilegitasun osoa dugu haserre egoteko eta adierazteko», adierazi dute Frantziako Estatuaren ordezkaritza aitzinean. «Hezkuntza duina eta gure hizkuntzan ikasteko eskubidea da eskatzen dugun bakarra». Hurrenez hurren gaitzetsi dituzte Parcoursup sistema eta bazkaltzeko tarte murritzegia uzten dieten ordutegia. «Frantziako Estatuak 4.000 postu hetsi ditu azken urtean, demografia aitzakiatzat hartuz. Gure gelak ikaslez gainezka dira, gelako tenperaturak igoz, irakasleen lan kargarekin batera. Azken finean gure hezkuntza okertu da», salatu dute. «Frantzia ezin omen du hezkuntzan inbertitu, zorra dela eta, baina armadan inbertitzea erabaki du. Frantziak etorkizunera begira nahiago du gerrarako prestatu begirada kritikodun gazteak hezi baino. Eta hori mundua murgiltzen ari den totalitarismo bortitzaren eta joera faxistaren islada da, zeinean izuak eta armek diruditen ihesbide bakarra».
Horrez gain, Frantziako Poliziaren bortzikeria eta jarrera euskarafoboa ere salatu nahi izan dituzte suprefetura aitzineko protestan. Izan ere, osteguneko protestan euskaraz aritzeagatik ikasle bat kolpatu zutela erran dute. Hala, oroitarazi dute euskararena ere badela Etxepareko ikasleen borroketako bat. «Hezkuntzako murrizketak gainerako ikasleen gisa jasateaz gain, gure hizkuntzan ikasketa ibilbide osoa egitea ukatua baitzaigu. Besteak beste, goi mailako ikasketak egiteko beharrezkoa den baxoa frantsesez pasatzera derrigortuz. Era berean, euskaraz ikasteari jartzen zaizkion oztopoak handiak dira, eta horrek milaka gazte urruntzen ditu beren hizkuntzatik».
