Orkoiengo Euskaltzaleak taldeak (Nafarroa) ohar bidez salatu du herriko udala gobernatzen duen PSN alderdiak euskararen ordenantza moldatu duela, eta «edukiz hustu» duela araua. «Orkoienen euskararen ordenantza aurrerakoi bat izan dugu 2009az geroztik, sentsibilitate desberdineko alderdien artean adostua, hizkuntza eskubideak babestu eta gure herriko bi hizkuntza nagusien arteko bizikidetza bermatu izan duena», azaldu dute oharrean. Udal gobernuak, ordea, euskara eskakizun guztiak erauzi dituela salatu dute. «Arlo guztiei eragiten die: kultura, eskolaz kanpoko jarduerak, haur eskola, aurrez aurreko eta idatzizko arreta, lantalde organikoa...». Ordenantza berriak euskara «herriko eguneroko bizitzatik desagertzea» ekar dezakeela uste dute euskaltzaleek: «Atzerapauso ikaragarria izanen da hizkuntza eskubideetan eta bizikidetzan».
Hori dela eta, mobilizazioak iragarri dituzte: «Euskaltzaleok bat egin behar dugu. Ezer egiten ez badugu, ziur gaude gure hizkuntzaren aurkako lehen erasoa izanen dela herrian. Argi utzi beharra dugu euskara gure herriko hizkuntza ere badela. Ez bakarrik guregatik; baita gure lagun, bizilagun, senide eta seme-alabengatik ere».
