Iazko apirilean Haurreskolak partzuergoak eta LAB eta Steilas sindikatuek akordioa lortu zuten lan baldintzak hobetzeko. Gaur, baina, zera salatu dute biek ala biek: Eusko Jaurlaritzak ez duela ituna bete, eta, horrenbestez, 63 lanpostu sortu gabe hasiko dutela ikasturtea. Horretarako, elkarretaratzea egin dute Haurreskolak partzuergoaren egoitzaren aurrean, Eibarren (Gipuzkoa).
Jaurlaritzak berak emandako datuen arabera, 2021ean 4.986 haur zeuden izena emanda Haurreskolak partzuergoan; 2022-2023ko ikasturtetik, zerbitzua doakoa da, eta erabakiak isla izan du izen emateetan: iragan ikasturtean 7.000 haur matrikulatu zituzten, hots, matrikulak %40,4 ugaritu dira. «Horiek horrela, agerian geratzen da hezitzaile gehiago behar direla eta lanpostu egonkorrak sortzea ezinbestekoa dela, Haurreskolak partzuergoak eskaintzen duen hezkuntza zerbitzuaren kalitatea bermatu dadin», nabarmendu dute sindikatuek.
Bi sindikatuek «gogor» kritikatu dute egoera, eta «lotsagarria» begitantzen zaie akordioa sinatu zutenetik urtebete baino gehiago igaroagatik ere oraindik ez sortu izana hitzartutako lanpostu horiek. Are, gaitzetsi dute Hezkuntza Sailak ez duela «alternatibarik eta proposamenik». Eta zera eskatu dute: negoziazio mahaia bilera batera deitzea «ahalik eta lasterren», eta «egoerari irtenbidea emango dion proposamen zehatz bat» aurkeztea.
