Bizkaiko PSE-EEko Hauteskunde Berme Batzordeak lurralde hartako hautagai nagusien berri eman du: Teresa Laespada izango da Bizkaiko ahaldungai nagusia, eta Nora Abete, aldiz, Bilboko alkategaia. Bai Laespada eta baita Abete ere hautagaiak izan ziren 2023ko hauteskundeetan.
Laespadak X sare sozialean azaldu du «ilusioz eta indarrez» eman duela pausu hau, «Bizkaia justuago eta solidario baten alde» lanean jarraitzeko. Bilbon jaio zen 1965ean. Zientzia Politikoak eta Soziologia ikasi zituen, eta Soziologian doktorea da Deustuko Unibertsitatean. Legebiltzarkidea izan zen 2009tik 2012ra bitarte. Egun, berriz, Enplegu, Gizarte Kohesio eta Berdintasun diputatua da Bizkaiko Foru Aldundian, eta PSE-EEko Enplegu eta Gizarte Politiketako idazkaria.
Abetek ere X sare sozialean partekatutako bideo batean kontatu du hautagai izango dela: «Ohorea litzateke niretzat Bilboko lehen alkate emakumezko sozialista izatea». Gaineratu du ohorea dela PSE-EE ordezkatu ahal izatea ere, eta «balio sozialistak hezur-haragitzea». Bilbon jaio zen 1985ean. Politika eta Administrazio Zientziak ikasi zituen, eta Kontsumoaren Zuzenbidea eta Ekonomia masterra. 2015etik 2016ra bitarte, Bizkaiko Foru Aldundiko Garraio, Mugikortasun eta Lurralde Kohesioko diputatuaren kabineteko kide izan zen, eta handik Kontsumobideko zuzendari izatera pasa zen. 2019tik zinegotzi da Bilboko Udalean; egun, Bilboko Udaleko alkateorde eta Mugikortasun eta Jasangarritasun zinegotzia da. PSOEko Merkataritza eta Kontsumo idazkari ere bada.
20.000 biztanletik gorako gainerako herrietako hautagaiak ere jakinarazi ditu PSE-EEk: Mari Jose Blanco izango da Portugaleteko hautagaia, eta Alba Delgado Barakaldokoa. Getxorako Carmen Diaz aukeratu dute; Santurtziko alkategai, Juan Andrades; Basaurirako, Isabel Cadaval; Leiorako, Pilar Grados; eta Durangorako, Jesica Ruiz, besteak beste.
