Eraso egin diote Jose Luis Alvarez Enparantza Txillardegi politikari, hizkuntzalari eta idazlearen omenez Donostiako Gaskonia plazan jarritako muralari. Margo gorriarekin pintaketak egin dizkiotela salatu du Joseba Alvarezek, Txillardegiren semeak, X sare sozialean. «Euskaldunon aurkako oldarraldiaren beste kapitulu bat», idatzi du Alvarezek, erasoa gaitzesteko.
ZAUNKA DABILTZA, ONDO GABILTZA
— Joseba Alvarez (@JosebaAlvarez) January 10, 2026
🚨🚨🚨🚨............................✊✊✊✊
Bihar, Txillardegi eta Joneri Antiguan, 12:00etan, egingo diegun omenaldiaren atarian TXILLARDEGIREN HORMA IRUDIA erasotu dute. Euskaldunon aurkako Oldarraldiaren beste kapitulua.
Faxismoaren STOP! pic.twitter.com/VpkkbvpGXJ
Mikel Herrero artista donostiarrak margotu zuen horma irudia, Donostiako Gaskonia plazan, eta 2018ko urtarrilaren 14an inauguratu zuten, idazle eta hizkuntzalariaren heriotzaren seigarren urteurrenean, hain zuzen ere. Txillardegi Udal Liburutegia herri egitasmoak antolatu zuen omenaldia. Txillardegi jaio zen etxaldea hurbil zegoen horma irudia dagoen lekutik.
Asteazkenean dira hamalau urte Txillardegi hil zela, eta, urteurrenaren karietara, hainbat ekitaldi antolatu ditu Txillardegi Liburutegia Kultur Ekimenak. Bihar egingo dute urteurreneko ekitaldi nagusia, Donostiako Antigua auzoko, Txillardegi plazan, 12:00etan. Besteak beste, lore eskaintza egingo diote, eta Pako Sudupek hitzaldia egingo du.
