Datorren astean beteko dira 50 urte Arantzazuko biltzarra egin zutela. Euskara batuaren jaiotza ofiziala izan zen. Urteurrena gogoan, Arantzazun bertan biltzar bat egingo dute datorren astean, Euskaltzaindiak antolatuta; Arantzazutik mundu zabalera (1968-2018) izango du goiburua.
Arantzazun bertan, beste keinu bat egin dute horren aurretik: Milikua ostatuaren horman plaka bat jarri dute Jose Luis Alvarez Enparantza Txillardegi gogoratzeko. Oñatiko Udalak hartu du erabakia, aho batez, Txillardegi Herri Ekimenak egindako eskaria onartuta. Txillardegik euskara batuaren alde egindako lana goraipatu dute. Milikua ostatuan egonaldiak egin ohi zituen, eta horregatik jarri dute han plaka.
#Txillardegi omentzeko plaka Milikuan#Memoriapic.twitter.com/1v66uZplwM
— Xabier Igartua (@XabierIgartua) 27 de septiembre de 2018
Ekitaldi xume bat egin dute iluntzean, plaka inauguratzeko. Oñatiko Udalaren erabakia txalotu du herri ekimenak, aitorpen ofiziala egin diolako Txillardegiri. Itxaropena agertu dute Donostian ere gisa bereko erabakiak har ditzaten.
Eskari zehatz bat ere egin dute ekitaldian: Euskaltzaindiari eskatu diote “publikoki eta ofizialki” aitor dezala Txillardegik euskara batua sortzeko eta garatzeko egindako ekarpena. 50. urteurreneko ekitaldiak egingo dituztenez datorren astean Arantzazun, uste dute akademiak “aukera ezin hobea” daukala Txillardegi gogoratzeko.
